Cabugao, Ilocos Sur – Maysa ti nalawa a pagtatalonan iti masakupan ti Brgy. Pila ti saan a mapadanonan ti irigasion ket agpannuray laengen ti tudo ti danumen dagiti kinelleng iti pagtatalonanda iti barangay kasta met iti kadarapatna a barangay ti Brgy. Dardarat iti laud nga abagatanna.
Iti pannakiuman ti Web In-Action idi Hunio 6, 2013, imbatad dagiti maseknan a mannalon iti nadakamat a barangay nga idauluan ni Mr. Pedro Salem, Presidente, a kaaduan a pagdanumda ti maurnong a tudo ken agpannurayda iti ayus ti kalsada ken waig no panagtatalon. Innayonda a nadarasda met a makapagraep ngem itinto panagpadakkelda ti mulada a pagay ti problemada ta agdependedanto ti itinnag ti ngato a pagdanumda ti raepda.
Babaen iti naregget a panangtulong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti rainfed farmers, nakikammayyet ti Munisipio iti Bureau of Soils and Water Management (BSWM) ket babaen ti panangaprobar ti Ahensia a sanga ti DA, impaay ti BSWM ti lima nga Small Farm Reservoirs (SFR’s) ti ili a Cabugao a pangrisut daytoy a pakaseknan dagiti rainfed area farmers.
Naaprobaran ti proyekto para iti Brgy. Pila ken Brgy. Dardarat, agkadarapat a barangay a pakakalian ti lima a nauneg ken nalawa nga abut a pagurnongan ti danum tapno adda madadaan a mausar dagiti mannalon (siphonic wenno mapakunotan ti motor) no agtikag ti rinaepanda.
Maar-aramid dagitoy a proyekto babaen ti Back Hoe ti Munisipio ken iti pannakitinnarabay dagiti mannalon iti nadakamat a barangay. Manamnama a makatulong ti dakkel daytoy a proyekto ita a panagtatalon (Wet Season 2013) ket impeksa dagiti mannalon a makasagrap ditoy a deppaarna ti dakkel a panagyamanda iti LGU-Cabugao iti panangilungalongda iti BSWM tapno maikkanda iti katulongan a pagdanuman.
Ti Brgy. Pila ket idauluan ni Brgy. Captain Romeo S. Galamgam ken ni met Brgy. Captain Danny S. Garcia iti Brgy. Dardarat. # (Web In-Action)
No comments:
Post a Comment