Cabugao, Ilocos Sur – Iti pannaki-uman ti Web In-Action idi Hunio 15, 2013, imbatad ni Mr. Marciano Raciles, Jr., Presidente, Cabugao Livestock Traders Association a nabun-as dagiti ayup a maipan iti Dayo gapu iti inisiatibada nga agawis ti umay makidayo tapno masustener iti aktibidades iti kada-Sabado a kaaldawan ti Dayo ditoy Cabugao.
Innayon ni Mr. Raciles a maikagkagumaanan iti Management a mangted ti gundaway iti tunggal Koridor a mapabulodan ti puonan tapno mariknada met ti kaadda ti importansiada ken makipagsakitda iti pakaseknan ken programa ti Cabugao Dayo. Innayon ni Mr. Raciles iti masansan a panagmimitingda/panagsasaritada iti asosasion tapno tratarenda dagiti tumaud a pakaseknan ken isyu no adda man tapno nasapsapa a masolusionan dagitoy.
Dagiti agparparti a kameng ti asosasion ti maudi a kamiting dagiti Koridor tapno maituyang met dagiti annuroten a maipakat iti panagbulodda iti pundo ti asosasion iti pannakigamuloda iti livestock sector partikular iti panagpartida ti ayup iti Tiendaan.
Dagitoy nga aksion ken inisiatiba ket gubuay iti direksion a tun-oyen ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agtultuloy a masustener ti operasion ti Cabugao Dayo ken maragpat dagiti mannalon iti livestock sector dagiti panggep ti asosasion a mangpasayaat iti hanayda iti daytoy a benneg ti Agrikultura. # (Web In-Action)
No comments:
Post a Comment