Cabugao, Ilocos Sur – Iti pannaki-uman ti Web In-Action idi Hunio 2, 2013, imbatad ni Brigada Eskwela Cabugao DepED Coordinator Donato P. Sajor a napateg unay ti pannakaisagana ti pagadalan babaen iti nairut a panagtitinnulong dagiti nagannak ken mangisursuro tapno saanen a maipatudon pay kadagiti ubbing ti adu a matrabaho iti uneg ti eskuela iti panangrugi ti klase.Naangay ti Enrollment Days iti Elementary Level idi Mayo 27-31, 2013 ket manamnama nga immadu ti bilang ti agad-adal gapu ta nainayon dagiti Kindergarten Pupils, nag-transfer nga agad-adal ngem nanayonan met dagiti mangisursuro nangruna iti Kindergarten Class.
Kanaig daytoy, nagdudupudop dagiti nagannak, guardian ken ubbing a napan naggatang ti kasapulanda a bag, kuaderno, ballpen, lapis, papel ken kanaigna pay a kasapulanda nga agbasa ken adda pay a naisamira a naggatang ti aruaten, uniporme, sapatos ken kanaigna a kawes iti panagadal iti aldaw ti Domingo, Hunio 2, 2013.
Iti kaadu ti naggatang iti NISTC-Public Market ken iti 2 Brothers Grocery, pimmardas met ti panagwerret ti ligay ti negosio maigapu iti panangisagana dagiti kasapulan dagiti agad-adal. Imbatad pay dagiti dadduma a nagannak ken agad-adal nga adu met latta ti bilangda a nakagatangen sakbayna iti school suppliesda sakbay ti panaglulukat ti klase iti Hunio 3, 2013. Nupay kasta, ti napateg ket nabuslon ti magatang, nakagatang ti amin a maseknan ken saan unay a ngimmina ti presio dagiti magatgatang a tagilako.
Mangnamnama ti kaaduan a nagannak a naballigi daytoy a tawen a panagrubuat ti panagbabasa dagiti ubbing ken mangabrasa kadagiti panagbalbaliw iti benneg ti Edukasion nangruna iti implementasion ti K to 12 Basic Education. # (Web Situational Report)
No comments:
Post a Comment