Cabugao, Ilocos Sur – Panagkammayet dagiti nagannak, mangisursuro ken Opisiales ti Barangay dagiti kangrunaan a ramen iti panangidur-as ti maysa a pageskuelaan a kas iti Bungro Elementary School, Brgy. Bungro, Cabugao, Ilocos Sur kas panagkuna ni Mr. Fidel Sinampaga, Head Teacher III ti nasao a pagadalan.
Iti pannakiuman ti Web In-Action idi Hunio 6, 2013, imbatad ni Mr. Sinampaga nga aggapu iti Special Education Fund (SEF) ti Munisipio, Fund Raising (PTA) ken DepED dagiti maus-usar a mangpasayaat ti pagadalanda kas iti pannakapinta ken pannakatarimaan ti School Stage-da, pannakapasayaat ti School Fence, pannakaaramid ti School Grotto, ken pannakapinta ken pannakatarimaan ti atep ken uneg dagiti pasdek-pagadalanda.
Nakammayet dagiti nadakamat a grupo iti pannakaipakat ti Brigada Eskwela 2013 (Mayo 25-31) ken Oplan Balik Eskwela 2013 (Mayo 27-Hunio 10) a programa ti DepED tapno sistematiko a naurnos ken nadalus ti pagbasaan dagiti ubbing itay panagseserrek ti klase.
Impeksa ni Mr. Fidel Sinampaga, Head Teacher III iti panagyamanna kadagiti dadaulo dagiti nadakamat nga Ahensia ken Asosasion a naggapuan ti naitulong iti eskuelada ken agraman metten dagiti mangisursuro nga adda iti babaenna. # (Web In-Action)
No comments:
Post a Comment