Cabugao, Ilocos Sur – Agtultuloy a maus-usar ti inted ti LGU-Cabugao nga espasio para iti “Bagsakan ti Nateng” iti igid ti Kalsada Nasional iti asideg ti NISTC Public Market, Cabugao, Ilocos Sur.
Iti panagrekurida ti Web In-Action itay nabiit, kinuna dagiti agipalpalugan iti nateng a kapigsa ita a bulan iti panagipatulodda iti nateng a maangkat ken mailako idiay Urdaneta, Pangasinan, Balintawak, Quezon City ken Divisoria, Quiapo, Manila.
Innayon dagiti agipalpalugan a nangrugida a nagoperar idi Nobiembre 2015 ken agpatingga inton arinunos ti Mayo 2016 gapu ta agtultuloy latta iti mailakoda a nateng iti deretso a panagmula dagiti mannalon.
Iti itatapog ti Tawen 2016, adu ti nakasagrap iti napintas a presio ta naisapada iti nagmula ti nateng kangrunaan iti Django Pepper ken ti Bell Pepper ta nangingngina ti panaggatang dagiti mailako kadagiti Merkado ngem kadagiti Trakan nga umay aggatang nga ilakoda met iti Paktoria nga agkasapulan kadagitoy a nadakamat a nateng nangruna iti sili.
Impeksa dagiti Komersiante/Agnatnateng iti panagyamanda ta mapapigsa manen ti panagipaluganda ti nateng ken mangnamnamada iti pannakatarabayda babaen iti LGU-Cabugao iti Bagsakan-da kadagiti masungad nga aldaw. # (Web In-Action)
No comments:
Post a Comment