DERETSO A PANAGMULADA TI NATENG, PAGSAYAATAN MET TI SAPASAP

Cabugao, Ilocos Sur – Maibatay iti rekord ti High Value Crops Development Program (HVCDP)-DA LGU Cabugao nga imatonan ni Mrs. Ester P. Aguimbag, AT, umab-abot iti nasurok a duagasut nga ektaria ti mamulmulaan ti nateng iti Munisipalidad  idi Tawen  2014,  ken  2015 nga agtultuloy a maapit iti Tawen 2016 gapu ta di agressat ti panagmula dagiti Vegetable Growers a kas katulongan a pagkakitaan dagiti mannalon nangruna kadagiti barangay vegetable producing area iti ili nga iyuna ti Barangay Salapasap.

Innayon ni Mrs. Aguimbag nga adda agduduma ti klasena  a kangrunaan a naimula ken  umabot iti nasurok a 700  a bilang ti mannalon/vegetable growers a nagmula  kas iti upo (tabungaw); paria; kamatis;  tarong;  okra;  stringbeans; karabasa; Finger Pepper;  Bell Pepper; Sweet Pepper; lasona;  bawang;  mungbean (balatong) ken kamote. Maibilang pay ditoy ti legume (mani) ken iti sandia a sakupen dagiti cash crops a karaman iti HVCDP Category.

Dagitoy ket naimula iti nadumaduma a barangay iti ili nupay iti tabako ken mais iti kaaduan a bilang ti  naimula ita a Cropping Season (Dry Season 2015-2016).

Kabayatanna, nainayon a makipagmula iti 195 a 4Ps Beneficiaries iti nadumaduma a barangay a nagsanay iti 16 Days a Good Agricultural Practices (GAP) on Vegetable Production nga inrusat ti LGU-Cabugao ken ti DSWD.

Insupusop ni Mrs. Aguimbag nga  itultuloy met dagiti agnatnateng a kameng ti Cabugao Vegetable Growers and Traders Association ken ti dadduma nga agmula iti off-season type (deretso) a panagpatanoran ti nateng.

Kabayatanna,  kaaduan kadagiti kameng ti Cabugao Vegetable Growers and Traders Associaton ti nagisapa met iti mulada ngem nagduduma ti klase ti nateng nga immulada tapno maliklikan iti mapasamak  nga  “oversupply” iti Merkado a mangipababa no kua  ti presio tapno masalakniban dagiti agmulmula.

Dagitoy nga inisiatiba ket resulta iti agtultuloy a panangtarabay ti Gobierno Munisipal nga idauluan ni  Mayor Edgardo “Ediboy” S. Cobangbang, Jr. kadagiti agmulmula ti nateng nangruna iti pannakatulong dagiti asosasion kadagiti barangay tapno adda latta mainayon iti pagtaraonda  a kasapulan ti nasalun-at nga umili. # (Web In-Action)