SOLID WASTE MANAGEMENT TI ILI, AGTULTULOY

Cabugao, Ilocos Sur – Impakaammo ni Mr. Edgar S. Balangatan, MENRO- Designate ti LGU-Cabugao  nga agtultuloy a mapaglalasin dagiti  nakolektada a basura para iti  maar-aramid a composting ken naipanda  iti disposal area. Dagitoy ket pakabuklan ti biodegradable materials (mapagrupsa)  a maipan iti Material Recovery Facility (MRF) iti kompania ti LGA Tech., Inc., partner-company ti LGU-Cabugao  a mamagbalin  nga organic fertilizer dagiti makolektada  a basura.

Dadduma a namantener  ken   nagdur-asan a gapuanan ti LGA Tech, Inc. a kapartner ti   LGU Cabugao iti pannakaisimpa  ti basura ket dagiti sumaganad:

1.Staff development tapno maingato  ti kinagaget  dagiti kaduada nga agtrabaho iti Ecology Center.

2.Napintas  nga operasion ti Central Material Recovery Facility (MRF)  a pakaus-usaran ti shredded machine iti basura sakbay a maipan iti composting bins/windrows tapno maparupsa ditoy.

3.Agtultuloy a pannakaipalagip  ti panamaglalasin kadagiti mabunag a basura uray manipud iti NISTC Public Market agraman kadagiti pasdek-negosio ken kadagiti service barangays  iti agdama.

4.Feedback Mechanism - babaen itoy a panagited ti kapanunotan ket maikkan iti gundaway dagiti Stakeholders (maseknan)  iti pannakaammo iti panagoperar ti Solid Waste Management Program ti Munisipio iti agdama.

5.Dadduma pay a pannakaited ti kasapulan iti panagaramid  ti organic fertilizer manipud iti DA-LGU  ken iti Bureau of Fire Protection (BFP-Cabugao).

Malaksid iti  14 a barangay a  masakupan ti segregated collection wastes iti agdama, mairaman met a maalaan ti basurana iti NISTC Public Market ken dadduma pay a commercial establishment ti ili. Kanaig daytoy, kiniddaw ni SBM Dr. Jemaima S. Tan-Yee, Committee Chairman on Environment iti LGA TECH., Inc.  a maalaan met ti basura dagiti pageskuelaan nga isitar ti programa.

Kabayatanna, manaynayonan ti LGA Tech., Inc.  iti maproduktona nga organic  fertilizer  iti  umabot ti 11,650 kilos. Madama met a maproseso (drying & curing) ti dadduma  a bulto ti agrupsa a basura.

Imbatad ti LGA Tech., Inc.  iti pannakamantener ti disposal area iti residual wastes. Innayon ti kompania a tapno at-atiddog ti pannakausar ti  disposal area ket regular koma iti compaction ti earth covering babaen iti pannakausar ti makinaria maminsan ti makalawas.

Dadduma pay nga aktibidad ti LGA Tech., Inc.  ket iti panangitedna ti Technical Assistance iti pannakaipinal ti 10-Year Integrated Solid Waste Management Plan ti Munisipio ti Cabugao. Kas paset ti proseso ket naaramid ti mini-workshop tapno mabukel ti Vision, Mission ken Goals ti Munisipio babaen iti programa ti pannakaprotektar iti aglawlaw.

Naaramid ti nasao a workshop itay nabiit babaen iti panangorganisar ti Municipal Planning and Development Office (MPDC) ken nagatendar pay dagiti  pannakabagi ti 14 a service-barangays; pannakabagi ti DepED; pannakabagi ti Health Sector ken dagiti pannakabagi ti Sangguniang Bayan nga isuda SBM Dr. Jemaima S. Tan-Yee; SBM Vicky S. Serna; SBM Jayhan Charisma Alcid-Tan; SBM Benedicto M.   Savellano ken ni SBM Josefina S. Vallejo. 

Dagitoy nga inisiatiba ket paset iti agtultuloy a pannakaipatungpal ti Solid Wastes Management Program ti Munisipio  babaen iti partnership ti LGA Tech, Inc. ken iti LGU Cabugao agingga iti agdama. # (Web In-Action)