Cabugao, Ilocos Sur – Agtultuloy a maaramid ti “Operation Timbang” babaen kadagiti Barangay Nutrition Scholars (BNS) ken dagiti Barangay Health Workers (BHW’s) iti 33 a barangay ti ili a Cabugao, Ilocos Sur ita a Tawen 2016, segun ken ni Mrs. Joenah G. Sevilleja, AT, Municipal Nutrition Action Officer.
Dagiti maserbisyuan nga ubbing ket manipud iti agtawen ti 1-5/11 Months tapno madeterminar no maibagay met laeng iti agdama a pagbasaran ken pagrukodan iti kasasaad ti ubing iti tawenna.
Innayon ni Mrs. Sevilleja a kaaduan nga agkuykuyog ti BNS ken ti BHW a mangsarungkar iti pagtaengan dagiti ubbing a timbangenda. Kasta met a maar-aramid latta ti Update ti Family Profile (Census) iti Pamilia ti ubing tapno makita iti pagdur-asan ti panagdakkelna. Mainayon pay a kakoordinarda dagiti kameng ti Kalusugan Pangkalahatan-Community Health Team (CHT) iti barangay tapno maimpormaranda iti pakabuklan ti nutrition status dagiti lumugar.
Kabayatanna, maipatungpal latta met iti pannakatimbang dagiti ubbing a maipan iti Rural Health Unit (RHU) kas mainayon a pangdeterminar iti kasasaad ti salun-at ti maseknan nga ubing a mapan maipaagas.
Dagitoy nga aksion ken inisiatiba ket paset iti naregget a pannakaipatungpal ti programa ti Nutrision babaen iti agtultuloy a suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web Situational Report)
No comments:
Post a Comment