Cabugao, Ilocos Sur –Maangay latta ti nasaknap a panaglinis iti Kalsada Nasional, Provincial ken Processional Routes, aglawlaw ken iti uneg ti Municipal Hall ken Government Center, pampubliko a pasilidades kas iti plaza, parke agraman iti NISTC Public Market babaen kadagiti Personnel ti LGU-Cabugao iti matapogan ti Tawen 2016.
Kabayatanna, igunamgunam ni MENRO Edgar S. Balangatan kadagiti umili nga agdalusda iti mabatogan ti pagtaenganda babaen iti panangiwanwan dagiti Opisiales ti Purok ken Barangay-da ken iti inisiatiba dagiti Asosasion iti Barangay ken dagiti nakasalinong iti LGU.
Iti sabali a bangir, kidkiddawen pay ni MENRO Balangatan kadagiti bumarangay ken NGO’s a tarabayen dagiti Opisiales ti Barangay iti pannakadalus dagiti kalsada, aglawlaw ken iti igid ti kabaybayan kadagiti pito a coastal barangay ti ili sakbay, kabayatan ken kalpasan ti napaut a Holiday Season.
Kanaig daytoy, naregget met ti agtultuloy a panagdalus dagiti mangtarawidwid iti Clean-up Drive ti NISTC Public Market nga idauluan ni Mrs. Norma S. Bertumen, Market Supervisor tapno mamantener ti kinadalus iti aglawlaw ken iti pagtagilakuan kalpasan ti pannakaselebrar ti Paskua 2015 ken iti pannakatapog ti Tawen 2016. # (Web Situational Report)
No comments:
Post a Comment