Cabugao, Ilocos Sur – Napnuan regget dagiti dadaulo ti 13 nga asosasion ti mannalon a nakaisubli ti binulodda a P23,000 (walo a bulanen a napalabas) a nagtitipon iti opisina ni Mayor Edgardo “Ediboy” S. Cobangbang, Jr. tapno awatenda ti bulodenda manen a sag-P23,000 (Tseke) manipud iti LGU-Cabugao para iti panangtulong kadagiti mannalon.
Imbatad ni Mayor Ediboy nga adda supapak ti natulnog nga agbayad ken mangisakit ti asosasion nga iti maipasublat a pundo ket maibanag a nasayaat a para iti pagsayaatan ti sapasap.
Kadua ti Alkalde ni SB Member Benedict M. Savellano, Chairman, Komite ti Agrikultura a nakisarsarita kadagiti opisiales ti mannalon sakbay a nayawat kadakuada ti Tseke-da.
“Karaman iti resolusion ti Pederasion ti 18 nga asosasion ket manamnama a maisarunoda a maikkan ti loan,” imbatad ni Mr. Elmer G. Bromeo, Federated Farmers President.
“Agyamankami kada Apo Mayor ken Konsehal ta tatta la a naaktibo dagiti mannalon. Adda met kastoy idi ngem namaymayat ti pannakaiwardasna tatta,” kinuna ni Mr. Gilmar Solmerin, Presidente ti Salapasap Farmers Association.
“Pagilasinan nga dimmur-asen ti kaammuan ti mannalon iti napaypayso a pannakaipataray ti asosasion,” insupusop ni Mr. Arthoro Solis, Presidente ti Arnap Farmers Association. # (Web In-Action)
No comments:
Post a Comment