Cabugao, Ilocos Sur – Maisupadi kadagiti Techno-Demo Farm iti Brgy. Carusipan gapu ti kinaubbog dagiti kinelleng.
Naipasdek ti Municipal Techno-Demo iti Brgy. Carusipan iti .5 Hectare a pamagayan a talon ni Brgy. Captain Oscar Pula a masarakan iti nagkalungogan a paset iti sakaanan ti nasamek a bantay iti dayaen ti barangay.
Daytoy a Demo-Farm ket nagbinnuligan ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ti DA-Regional Field Unit 1 nga idauluan ni DA OIC Regional Executive Director Dr. Valentin U. Perdido, Ph D.
Imbatad ni Mr. Edgar S. Balangatan, AT-MENRO-Designate ken Supervising Technologist a nausar ti hybrid seed (PHB 71) a patanor ti Pioneer a kompania ket manamnama a maapitan ti 7-10 Tonelada ti kada ektaria daytoy a klase ti bin-i.
Innayon ni Mr. Nereo S. Daproza, Municipal Rice Program Coordinator ken kadua ni Mr. Balangatan nga addanto maaramid a Field Day ditoy a nakaaramidan ti Techno-Demo a dumar-ayan dagiti opisiales ti DAR-FU ken LGU-Cabugao inton maapit daytoy.
Daytoy a panangisaknap ti panaghybrid ti amin a mannalon ti Munisipalidad ti Cabugao ket paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a pannakaingato ti bilang ti maapit tapno saan a maibusan ti pagtaraon ti umili ken manayonan ti sapul ni mannalon. # (Web In-Action)
No comments:
Post a Comment