Cabugao, Ilocos Sur – Naangay ti Multisectoral Meeting ti Munisipalidad ti Cabugao ita a Hunio 10, 2012 iti SB-ABC Hall a nagatendaran dagiti Kapitanes ti Barangay, pannakabagi ti DepEd Cabugao District, PNP, BFP, NGO, ken LGU-Cabugao tapno mapagtutulagan ti maaramid a Tree Planting Activity, tinawen nga ar-aramiden dagitoy a sector kas pangsuporta iti Greening Program ti Gobierno Nasional.
Naluktan ti miting babaen ti panag-preside ni Mr. Edgar S. Balangatan, AT/MENRO ket inlawlawagna ti pannakaipakat ti Greening Program babaen ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti masakupan ti Munisipalidad: pannakapataud ti seedlings, wagas a pannakaiwaras ti maimula, disso a pagmulaan, ken napabiag a naimula iti kallabes a tawen.
Napagkaykaysaan nga iti watershed area ti Roma, Kinalian ken Magarang ti pakaimulaan ti 5,000 a seedlings a naisagana nga ited ti Tanim Kalikasan, Inc. ken ti Municipal Nursery ti LGU.
Imbinsa ni Forester Jimmy Sonido, Information Officer ti CENRO Vigan City ti pateg ti panangsalbar ti aglawlaw ken ti maimula a seedling a pakairanudan ti sapasap nangruna iti angsen nga oksiheno.
Maangay ti Tree Planting babaen iti per barangay a papan iti watershed area inton Hulio 14, 2012 iti Barangay Maradodon ken Brgy. Carusipan idinto ta inton Hulio 21, 2012 iti ragup idiay Magarang Spring. Agkikita ti amin a makipaset iti Brgy. Cacadiran nga ayan dagiti maimula a seedlings iti 5:30 am ti bigat iti dayta a petsa.
Imbatad ti pannakabagi ti Tanim Kalikasan, Inc. a no masurot ti 2 by 3 meters a panagmula ket mabayadan ti P.50 ti kada pinuon ti naimula sa maikkanda ti pagganaganda inton Oktubre 2012.
Nagatendar met da SB Member, Dr. Jemaima Tan-Yee, Chairman, Committee on Environmental Management ken SB Secretary Maxfel S. Suboc. # (Web In-Action)
No comments:
Post a Comment