Cabugao, Ilocos Sur – Nairubuat ti organic farming (panagmula ti pagay ken nateng) dagiti 21 a kameng ti 4-H Club ti Barangay Sabang nga idauluan ni Mr. Joel Imperio babaen ti panangtarabay ti DA-LGU nga idauluan ni Municipal Agriculturist Zenaida S. Andrada ken Mrs. Joenah G. Sevilleja, Municipal 4-H Coordinator babaen ti panangaprobar ni Mayor Edgardo S. Cobangbang, Jr.
Napunduan daytoy nga aktibidad babaen ti Livelihood Assistance Fund manipud iti DA-RFU 1 ken ti LGU-Cabugao. Ita a bulan ti Hulio 2012 ket makumikomda ti panangtaripatoda kadagiti naimulada a pagay ken nateng.
Buklen dagiti naimula ket ti maysa-ektaria a pagay; .25 Ha., Kamatis; .25 Ha., Tarong; .25 Ha., Paria; ken .25 Ha., Sandia. Nupay organiko ti ad-adda a mausar, maibalanse met ti komersial nga abuno no kasapulan ti mula.
Dagiti napateg a gubuayen daytoy a gannuat:
- Mangnayon ti matgedan dagiti agtutubo ken mairaman ti pamiliada a mabenepisiaran.
- Tumulong a mangipromot ti pagtaraon a saan unay a naaplikaran ti ganagan ken pestisidio.
- Mangsursuro kadagiti agtutubo nga agbalin nga enterpriser (managnegosio).
- Mapatibker ti panagkaysa ti Out-of-School Youth ken 4-H Club a makikammayet iti Gobierno Lokal para iti pagsayaatan dagiti agtutubo.
- Maiparikna iti panangtaming ti LGU iti pannakatiped ti kinakurapay kadagiti komunidad babaen iti panagmulmula .
Daytoy a proyekto ti agtutubo ket tarabayen met ti Konseho ti Barangay Sabang nga idauluan ni Barangay Captain Edgardo S. Cobangbang, Sr. . # (Web In-Action)
No comments:
Post a Comment