Cabugao, Ilocos Sur – Nabuangay ti gunglo dagiti mannalon a mabenepisiaran iti pannakaaramid ti Mini-dam a programa ken proyekto ti Departamento ti Agrikultura (DA) nga “Small Water Impounding System Association-SWISA”.
Napanaganan ti gunglo iti “Pug-os, Reppa-ac, Bato Irrigators Association” a nakapilian ni Ex. Brgy. Captain Prudencio Castillo ti Brgy. Reppa-ac a Presidente ket addaanda ti 63 a kameng a mangsuksukay ti 75 ektarias a talon a mapadanuman dagitoy a mini-dams a maaramid iti waig a nangbeltak kadagitoy a barangay.
 |
| Ni Henry Saliganan, Tesorero ken Representative ti IA a nainterbiu babaen iti Web In-Action |
Imbatad ni Mr. Henry Saliganan, Tesorero ti IA a tallo a disso ti maputtot a paset ti waig. No agpigsa ti tudo, mataya ti danum iti waig imbes nga agtarus iti baybay. In-inut a maibulos daytoy iti kanal a maaramid a kumamang/mangsuportar ti padanum dagiti masakbayanna a taltalon.
Innayon ni Saliganan a no mabunnong ti danum ket agubbog iti babaen dagiti puttot ket saanton a malgangan ti danum dagiti bubon ken mangsolbar ti palalo a kinakiddit ti ubbog iti Brgy. Reppa-ac.
Maangay ti panagmiting ti gunglo iti maikadua a Domingo ti bulan.
Segun ken ni Mr. Obas Bill Y. Baclig, AT/DA-LGU, naiproseson ti Paglintegan ken Rehistrona iti DOLE.
Naisubmiter ti IA Resolusion a mangkiddaw ti pannakaipatungpalen daytoy a proyekto a naidirihe ken ni DA Secretary Proceso J. Alcala babaen ti panangisubmiter ni Federated Farmers President Elmer G. Bromeo iti panagatendarna ti seminar ti DA idiay Manila.
Ti proyekto a SWISA ket naisangrat a pangsolbar ti pagpadanuman dagiti rainfed area kas kadagiti nadakamat a nagkaykaysa a barangay ti Munisipalidad ti Cabugao.
Dadduma nga opisiales ti gunglo: Bert Vicente, Vice President; Teresita Serdenia, Secretary; Analyn Yangat, Sub-Secretary; Henry Saliganan, Treasurer; Reynaldo Saliganan, Auditor; Avelino Castillo ken Victorino Saliganan, P.I.O. # (Web In-Action)
No comments:
Post a Comment