Cabugao, Ilocos Sur – Naaprobaran ti Goat Raising Project ti 4-H Club Namruangan nga agbalor ti P100,000 nga ited ti DA-RFU1-Agricultural Training Institute (ATI), Sta. Barbara, Pangasinan. Dimteng ditoy ili a Cabugao ti grupo ni Ms. Evelyn Tuliao, 4-H Club Regional Coordinator and Rural Based-Organization Focal Person idi Hulio 19, 2012 ket naiwayat ti Final Evaluation iti nasao a requested project.Kinadua ni Mrs. Joenah G. Sevilleja, AT/DA-LGU ken Municipal 4-H Club Coordinator ti grupo ti ATI a nag-evaluate. Manamnama a maruk-atan ti nasao a pundo agingga iti Disiembre 2012.
Segun ken ni Coordinator Sevilleja, maiwayat ti panagsanay dagiti 4-H Club Members ti Brgy. Namruangan iti Goat Raising Management, Bookkeeping, ken Leadership Training sakbay nga awatenda ti proyekto.
Immuna a proyektoda ti Fish Cage iti sabangan ti Karayan Cabugao ket naballigi ti resultana.
Ti 4-H Club ket imatonan ti DA-LGU ken agtultuloy nga ik-ikkan ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ti importansia dagiti out-of-school youths iti Munisipalidad nga agkaykaysa kas asosasion tapno maprobitsarda dagiti mayataday a serbisio, oportunidad ken pribilehio nga ipaay ti nadumaduma nga Opisina ken Ahensia.
Dagiti baro nga opisiales ti 4-H Club Namruangan: Antonio Rabor, President; Mina Grace Sunio, Vice President; Amelyn Rabor, Secretary; Jonathan Raquenio, Treasurer; Shiela Gorospe, Assistant Treasurer; Jojo Cabaddu, Auditor; ken Raymart Rabor, PIO; # (Web In-Action)
No comments:
Post a Comment