Cabugao, Ilocos Sur – Inyalat ni Macrina Irorita Saturno, 52, Barangay Nutrition Scholar ti Brgy. Bonifacio, Cabugao, Ilocos Sur ti kina-Most Outstanding BNS ti Region 1 iti Tawen 2011 babaen ti panangpili kenkuana ti Regional Nutrition Evaluation Committee.
Naragpat ni Saturno daytoy a pammadayaw maigapu iti narigat a mapatasan a gapuananna iti tay-ak ti panagserbi iti nutrision iti Barangay ken Munisipal a benneg. Isu ti Provincial Winner, napili a Siglat Awardee (namindua a daras) a nagpuonanna sakbay a nainominar para iti Regional Level iti evaluation a naisayangkat iti Tawen 2011-2012.Iti surat ni Gov. Luis “Chavit” Singson, Chairman, Provincial Nutrition Committee, kinomendaranna ti liderato ni Mayor Edgardo “Ediboy” S. Cobangbang, Jr., Chairman, Municipal Nutrition
Committee kasta met a binigbigna ti dayaw ti Probinsia ken ili a nagun-od ni BNS Macrina I. Saturno maigapu iti naregget a programa ti Nutrision ti Munisipalidad a nangtignay kadagiti BNS a nangipakat ti kabaelanda ken napintas a panagserbida iti komunidad-da.
“May this recognition will inspire us more to continue empowering our people to actively participate in the formulations of plans and programs intended for the betterment of the lives of our constituents. With my highest esteem and warm regards!” Paset pay ti surat ni Gov. Chavit ken ni Mayor Ediboy ken dagiti umili ti Cabugao.
Kabayatan a maur-uray ti pannakapadayaw ni Saturno iti Rehion, imbatadna a naipagtengen ti gandat dagiti Federated BNS Presidents ti Ilocos Sur a bumisita iti Barangay Bonifacio ken iti Munisipalidad ti Cabugao inton Hulio 24, 2012.
Maysa pay a puonan ni Saturno ti adalna: Bachelor of Science in Psychology iti Far Eastern University (FEU) a naiturposna idi 1980. Civil Service Eligible (Professional) ni Macrina, awag dagiti gagayyemna. Produkto isuna ti Cabugao South Central School ken Cabugao Institute. # (Web In-Action)
No comments:
Post a Comment