Cabugao, Ilocos Sur – Maragsakan ita dagiti umili ti Cabugao, agdaldaliasat ken kasta met ti Gobierno Munisipal nga idauluan ni Mayor Edgardo “Ediboy” S. Cobangbang, Jr., ta narugianen ti pannaka-upgrade ti kalsada-nasional ti Manila North Road a masakupan ti ili a Cabugao, Ilocos Sur babaen ti pundo ti Regular Infra CY 2012 manipud iti Department of Public Works and Highways (DPWH), Region 1.
Segun ken ni Foreman Edwin Oliveros ti Satrap Construction, Co., Inc., mangtarabaho ti pannakatarimaan ti highway road, narugian ti rehabilitasion idi Mayo 28, 2012 ket iti panaglabas ti aldaw, mapasamak ti apagapaman a trapiko kadagiti agdaldaliasat a lugan ken motorista iti agsumbangir a direksion.
“Ipapaawatmi kadagiti ma-traffic nga agan-anustayo ta kasta a talaga no umay ti improvements,” kinuna ni Mr. Mike Lee, Traffic Aide ti Satrap. “Maymayat tatta ta agusarkami ti traffic lights ket makaammoda nga agbibinnigay iti agsumbangir a direksion.”
“Maital-o mampay ti riknami nga makadamag a lumawa ken masemento ti haywey-tayo. Agyamankami kadagiti Appo nga dadaulo ti Gobierno. Nadaras nga urayen ti mano la a bulan santo malpas. Adda makitan, apo, ngem ‘diay padpadaanan pay koma,” imbatad ni Mr. Veronico Piedad, dati a Kagawad ken agdama a Presidente ti Senior Citizen Association ti Brgy. Sagayaden, Cabugao, Ilocos Sur.
“Ala, nasayaat met ta mauray dagitoy a progreso ti ilitayo. No isarunodanto nga sementuen daytoy sumrek ti ISECO ket idanonmo man kadagiti agrebbeng, barok, a makanalan ken maimbornalan ‘toy batog ti talonko,” Kalikagum met ni Mr. Deogracias Sunio iti Brgy. Sagayaden Sur.
Iti pannakapasayaat ti Highway Road ken dadduma nga impraestruktura ket umadu pay ti aktibidades ti negosio ken agtal-o ti ekonomia ken amin nga aspeto ti biag dagiti agnaed iti Munisipalidad ti Cabugao, panirigan ti kaaduan a mabenepisiaran. # (Web In-Action)
No comments:
Post a Comment