Cabugao, Ilocos Sur – Determinado ti Pamilia-LGU ti Cabugao, Ilocos Sur a mamantener ti kinadalus ken kinadalimanek ti aglawlaw tapno maay-ayo dagiti umili ken bisbisita a mangbuya ti paggarawanda kabayatan nga asikasuenda ti pakaseknanda nga umay iti Munisipio.Imbatad ni Mr. Edgar S. Balangatan, AT/MENRO-Designate ti regular a panangmobilisarda kadagiti kaduada iti Munisipio nga agdalus, agsipat ti samek iti agsumbangir ti Kalsada Nasional manipud Brgy. Sagayaden agingga iti Brgy. Pug-os. Isamirada pay nga i-grass cutter dagiti naruot a paset iti baet dagiti pasdek ti opisina. Ikkatenda dagiti nagleppay/nabengbeng a sanga dagiti kayo iti aglawlaw ken ipaknida dagiti makasali a bambanag kadagiti pagnaan/pagdadanonan ti tao ken lugan iti amin a pasilidad-pampubliko ti Poblasion.
Iti sabali a bangir, di met agliway dagiti empleado ti Munisipio a karaman iti panagmantener ti aglawlaw ken ti uneg ti pasdek ti Munisipio. Imbatad ni Foreman Irene Piros a masapada nga agdalus ti kada aldaw ti opisina tapno maisagana a nasayaat ti pagopisinaan ken ti aglawlaw a sangbayan dagiti agopisina ken dagiti umili nga umay iti Munisipio iti agmalem. # (Web In-Action)
No comments:
Post a Comment