RN-HEALS, KATULONGAN ITI SEKTOR-SALUN-AT

Cabugao, Ilocos Sur – Nagmiting dagiti kameng ti Registered Nurses for Health Enhancement and Local Services a (RN-HEALS) ken ti RHMP  (Rural Health Midwife Program) idi  Hulio 20, 2012 iti Rural Health Center  babaen ti panang-preside ni Mrs. Janet Sison, Registered Nurse, RHU Cabugao tapno mairingpasda dagiti health forms a fill-up-an-da ken na-update dagiti aktibidadesda iti pannakaipatungpal ti “Kalusugan Pangkalahatan Program” ni P-Noy partikular pay iti 4 P’s.

Nangrugida a nagserbisio idi Marso 2012. Malaksid iti pannakaited ti reportda iti Department of Health, Regional Office 1, itedda pay ti reportda ken ni Mayor Edgardo “Ediboy” S. Cobangbang, Jr., Ehekutibo  ti LGU a nakaikammayetanda.

Kangrunaan nga ar-aramidenda kadagiti 4 P’s Area ti Munisipalidad ket tumulong iti panagala ken update  ti Profile kadagiti kameng. Tumulongda pay iti RHU Center nga agasikaso kadagiti kliente a mabakunaan, matratar nga ubbing ken maladaga ken dadduma pay a trabaho ti Nurse iti balay-pagagasan ti Munisipio.

Ti pannakaipaay  ti  serbisio dagiti kameng ti RN-HEALS ken RHMP  kadagiti umili ket parte ti programa ti salun-at nga itantandudo  ni Mayor Ediboy tapno  maatendaran   dagiti kasapulan dagiti umili  ket maipaay dagiti umisu a serbisio a kas iti kabaelan  dagiti nurses ken midwives tapno mapagtalinaed ti gin-awa ken sudi  nga ipaay ti pateg ti salun-at kadagiti umili.

Dagiti kameng ti RN-Heals ken RHMP  a nakadestino iti RHU-Cabugao ket isuda: Kristal Mae Baclig; Neisel Ruth S. Sajonia; Michael Sison; Christian Bryle Friala; Danielle Grace Gazmen; Dyna Junel Lopez; Donna Retuta; Joy Sayo; Carol Manantan ken Jennifer Cobangbang. # (Web In-Action)