Cabugao, Ilocos Sur – Narugianen a naiwaras dagiti ganagan nga Ammonium Sulfate ken Organic Fertilizer kadagiti nakaisangratanna a mannalon tapno adda mausarda iti umay a panagtatalon ti Wet Season 2013 (Hunio-Nobiembre).
Idi Mayo 16, 2013, inasistiran dagiti pannakabagi ti DA-LGU Cabugao dagiti mannalon iti Barangay Marga-ay, Cabugao, Ilocos Sur nga idauluan ni Mr. Wilson Discion, Presidente-FA, agraman dagiti Opisiales ti Barangay nga idauluan ni Brgy. Captain James Sera iti indibidual a pannakaited ti saggaysa a bag nga Ammonium Sulfate ken Organic Fertilizer kadagiti addaan ti Farmer’s ID a mannalon.
Batang met ti Brgy. Nagsantaan iti pannakaiwaras ti ganaganda iti kabigatan ti Mayo 18, 2013 babaen ti panangasistir da Brgy. Captain Mario Peralta, FA President Kagawad Roberto Sablay ken Municipal Technologist Obas Bill Y. Baclig.
Daytoy a subsidy ket naaprobaran babaen ti Konseho Munisipal iti napalabas a tawen 2012 babaen iti pundo ti RA 7171 (Municipal Share) tapno maipaayan ti tulong dagiti mannalon a mangkomplementar iti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangikagumaanan ti pannakapasayaat ti kabibiag dagiti mayoridad nga umili ti Cabugao, Ilocos Sur. # (Web In-Action)
No comments:
Post a Comment