Cabugao, Ilocos Sur – Kalpasan a maited dagiti Conditional Cash Grants (CCG) babaen ti DSWD ken LGU-Cabugao kadagiti kameng ti Pantawid Pamilyang Pilipino Program (4 P’s) kadagiti barangay, agtultuloy met a masuknalanda babaen kadagiti naalibtak a MSWD Personnel ti LGU-Cabugao nga imatonan ni MSWD Officer Mrs. Lydia S. Gazmen tapno maadalanda kadagiti praktikal a panangikagumaananda ti napintas a kasasaaad ti panagbiagda.
Iti pannaki-amad ti Web In-Action idi Mayo 16, 2013, imbatad ni Miss Jessie Anne O. Tabut, Municipal Link Cabugao a matratar ti amin nga aspeto ti kasasaad dagiti pamilia a mainaig iti programa ti 4 P’s tapno maipasigurado a matun-oyan dagiti panggep ti programa babaen iti sustainable visit and education kadagiti recipients.
Iti dayta met la a petsa, kadua ni Ms. Tabut ni Municipal 4 P’s Focal Person Miss Aida Cueto a nangadal/naglektiur kadagiti 4 P’s members iti Barangay Daclapan iti bigat ken iti Brgy. Turod iti kamalmanna. Innayon ni Ms. Tabut a by clustering group iti ideal nga 45 a kameng ti ar-aramidenda kadagiti barangay tapno malpasda nga epektibo ti targetda iti binulan iti panageskediulda a mangsapasap kadagiti barangay.
Ti Pantawid Pamilyang Pilipino Program (4 P’s) ket naipangruna a programa ni Presidente Benigno S. Aquino III para kadagiti napanglaw a pamilia ket ipatungpal ti DSWD ken kapartnerna dagiti LGU’s a mangisaknap kadagiti barangay ken away iti intero a pagilian.
Iti agdama, naballigi iti pannakaiyimplimentar ti nasao a programa iti LGU-Cabugao nga idauluan ni Mayor Edgardo “Ediboy” S. Cobangbang, Jr. # (Web In-Action)
No comments:
Post a Comment