Cabugao, Ilocos Sur –Naangay ti pannakaibunong dagiti subsidized fertilizers (Ammonium Sulfate ken Organic Fertilizers) kadagiti ID Card Holder a mannalon iti Brgy. Turod, Cabugao, Ilocos Sur idi Mayo 21, 2013 babaen ti panangiwardas da Brgy. Captain Inocencio S. Sadac ken Farmer’s Association President Kagawad Edgardo Garcia iti mismo a Barangay Multi-purpose Building, Brgy. Turod.
Sakbay ti distribusion, naangay ti ababa a miting dagiti mannalon iti Barangay Multipurpose Building ket napagsasaritaan iti umisu a pannakausar dagitoy nga inputs ken ramit a maipaay kadagiti mannalon manipud iti Gobierno Munisipal ti Cabugao nga idauluan ni Mayor Edgardo “Ediboy” S. Cobangbang, Jr.
Nairapin pay a napagpapatangan iti Cropping Calendar and Activities ti panagtalon iti Wet Season 2013 ket nagipadamag ni Mr. Edgar S. Balangatan, AT-DA LGU a destino a Teknisian ditoy a barangay kadagiti posible a paggatanganda iti rice seeds a mabalin nga usaren dagiti mannalon ita a panagtatalon. Napagsasaritaan pay dagiti pakaseknan dagiti mannalon babaen ti pannakipagtaming da Kapitan Sadac ken FA President Garcia ket naballigi a napagtutungtongan dagiti pakaseknanda.
Kamaudiananna, naibunong dagiti ganagan (maysa nga Ammonium Sulfate ken maysa nga Organic) ti kada mannalon idinto a nai-turnover dagiti rolyo ti hose kadagiti lider/pannakabagi ti tunggal grupo nga agusar kadagitoy babaen kada FA President Garcia ken Destino a Teknisian, Mr. Balangatan.
Nakipagtaming met ni SBM Benedicto M. Savellano, Committee Chair on Agriculture iti daytoy nga aktibidad dagiti mannalon.
Timmulong iti nasao nga aktibidad da Mr. Robert S. Savella, Mrs. Ester Aguimbag, Miss Katryn Tapuro, Miss Melanie Saquiton ken Mr. Humprey S. Catriz. # (Web In-Action)
No comments:
Post a Comment