Sunday, May 5, 2013

SEED PRODUCTION 2013 TI DA-LGU, NAGBALLIGI

Cabugao, Ilocos Sur – Iti pannaki-amad ti Web In-Action  iti Mayo 3, 2013, imbatad ni Mr. Obas Bill Y. Baclig, AT-DA LGU Cabugao  a  nalpasnan a naamiris dagiti Inbred Rice Seeds  kas iti  Certified PSB Rc 14 (RIO GRANDE) Rainfed Lowland TPR; Certified/Registered PSB Rc 82 (Penaranda) agraman dagiti  Certified/Registered  NSIC Rc 216 (TUBIGAN 17); NSIC Rc 222 (TUBIGAN 18); NSIC 226 (TUBIGAN 20); NSIC 240 (TUBIGAN 22);  ken Registered NSIC Rc 288 (SAHOD ULAN 10) Rainfed Lowland Dry. 

Kaaduan kadagitoy ti mairaep iti Irrigated Lowland.


Maibasar iti rekord ti Seed Inspector iti DA-LGU Cabugao, umabot iti 1,070  a bags ti Certified/Registered ti naproduksion dagiti Seed Growers  a madadaan ita a maisuplay/usaren  dagiti mannalon para panagtatalon  iti Wet  Season 2013 (Hunio-Nobiembre). Magatang ti tunggal bag iti P1,200 iti Certified Seeds idinto ta P1,600 ti Registered Seeds.

Dagiti rehistrado a Seed Growers ket da Mr. Alfonso Seatriz ti Brgy. Baclig, Mr. Allan Serna, Sitio Lusong Suyo, Brgy. Baclig,  ken Mr. Bonifacio Siababa, Brgy. Sagayaden, agpapada a barangay ti Cabugao, Ilocos Sur.

Dagitoy nga inisiatiba ket paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti  panangipatungpal ti DA-LGU Cabugao a pannakaidur-as ti Baro a Teknolohia iti pagay ken  panagtalon  iti benneg ti  Agrikultura iti Munisipalidad.   # (Web In-Action)

No comments:

Post a Comment