CABUGAO DAYO, PAGGAPUAN TI MAIPATARAKEN ITI 4-H CLUB

Cabugao, Ilocos Sur – Agtultuloy a dumurdur-as ti Cabugao Dayo no maipapan iti pannakapataud  dagiti napipintas a puli ti ayup a mapatanor. Imbatad ni Mr. Marciano Raciles, Jr., Presidente ti Cabugao Livestock Traders Association nga umuna ditoy a gumatangan ti LGU-Cabugao iti papatan-ayen  nga ayup (baka) a maipataraken kadagiti kalalaingan  nga asosasion ti 4-H Club iti Munisipalidad. Daytoy a proyekto ti livestock production ket sinuportaran  ti LGU-Cabugao nga idauluan ni Mayor Edgardo “Ediboy” S. Cobangbang, Jr. babaen iti pundo  ti Munisipio iti Performance Challenge Fund for Agriculture  a naisangrat para iti 4-H Club. Daytoy a gannuat ket  naaprobaran iti Konseho Munisipal  babaen iti panangilungalong  ni SBM Benedicto M. Savellano, Committee Chair on Agriculture ken imatonan ni Municipal 4-H  Club Coordinator Obas Bill Y. Baclig.

Kabayatanna, innayon ni Mr. Raciles a saan nga agsarday ti panangipakatda kadagiti wagas a mangpasayaat ti trading system iti ayup iti Cabugao Dayo ken iti agtultuloy a pannakaidispley iti nabubun-as latta ti klasena nga ayup a pagaayat a gatangen dagiti partidor ken indibidual a mannalon iti kaaldawan ti Dayo. # (Web In-Action)