Cabugao, Ilocos Sur –Agtultuloy a maiwaras dagiti ganagan nga Ammonium Sulfate ken Organic Fertilizer kadagiti nakaisangratanna a mannalon tapno adda mausarda iti umay a panagtatalon ti Wet Season 2013 (Hunio-Nobiembre).
Idi Mayo 20, 2013, inasistiran dagiti pannakabagi ti DA-LGU Cabugao dagiti mannalon iti Barangay Sabang, Sagayaden, Cacadiran, Catucdaan ken Reppa-ac, Cabugao, Ilocos Sur nga idauluan dagiti Kapitanes ti kada barangay agraman dagiti Opisiales ti Farmer’s Associations a naka-base kadagiti nadakamat a naggigiddan a barangay.
Naited ti maysa a bag nga Ammonium Sulfate ken maysa a bag nga Organic Fertilizer kadagiti addaan ti Farmer’s ID a mannalon.
Daytoy a subsidy ket naaprobaran babaen ti Konseho Munisipal iti napalabas a tawen babaen iti pundo ti RA 7171 (Municipal Share) tapno maipaayan ti tulong dagiti mannalon a mangkomplementar iti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangikagumaanan ti pannakapasayaat ti kabibiag dagiti mayoridad nga umili ti Cabugao, Ilocos Sur bababen iti pannakaited ti pangrugianda nga usaren iti panagtalonda. # (Web In-Action)
No comments:
Post a Comment