SPED CENTER, DEP-ED CABUGAO, MAIPASDEK ITI CSCS

Cabugao, Ilocos Sur – Napili a maysa kadagiti sentro ti Special Education (SPED) Center iti intero a Dep-ED Region 1 ti Cabugao South Central School, Brgy. Bonifacio, Cabugao, Ilocos Sur. Daytoy ket rinekognisar ken inaprobaran ti Dep-ED Central Office gapu iti epektibo a pannakaisuro dagiti ubbing nga adda pagkuranganna ngem nasayud pay laeng nga aturen babaen iti sistema ti pannakaedukar kadakuada iti umisu a pamay-an.

Sakbayna, naibaon ni Mrs. Melvi S. Sajonia, Principal II, Cabugao South Central School a nangibagi  iti Dep-Ed Region 1  a napan nagsanay iti Organization, Administration and  Supervision of Special Education (OAS SPED)  babaen ti capability building program  ti Human Resource Training and Development (HRTD) idiay University of Southeastern Philippines, Davao City  idi Abril 1, 2013 agingga iti Mayo 2013. Maituloy ti panagsanay iti bulan ti Agosto agingga iti Disiembre 2013.

Babaen iti Dep-ED Memo No. 52, s. 2013, nairaman ni Mrs. Sajonia kadagiti napili iti Scholarship Program for Special Education  (SPED) Teachers, Administrators and Supervisors a mangileppas ti 18 Units iti Batch of the Returning Scholars iti aspeto ti Gifted and Talented, Learning Disability, and Visual Impairment.

Adda met kadua ni Mrs. Sajonia a maka-avail iti New Batch of Scholars a mangadal iti Hearing Impairment, Intellectual Disability, Visual Impairment, and Multiple Disability with Visual Impairment.

Daytoy a two-term scholarship program (first term-summer; second term-from August to December) ket maangay dagitoy a panagsanay kadagiti eskolar manipud iti nadumaduma a rehion ken naituding a venue, Center of Excellence (COE’s) iti masakupan ti Luzon, Visayas ken Mindanao a nagrugi iti April 1 ken April 10. 2013.

Iti pannaki-amad ti Web In-Action idi Mayo 21, 2013, imbatad ni Principal Sajonia a maisagsagana  iti maaramid a launching program ti SPED Center iti nasao a pagadalan. # (Web In-Action)