Cabugao, Ilocos Sur –Iti pannaki-amad ti Web In-Action iti Mayo 17, 2013, imbatad ni Dr. Cesar Soller, DVD, Barang-ay Demo-Farm Campus Dean/Farm Manager nga umabot iti 100 nga estudiante a mangal-ala iti kurso-agrikultura ti makasagrap iti programa ti Gobierno Probinsial nga idauluan da Gov. Luis “Chavit” Singson ken Vice Governor DV Savellano a summer job assistance nga ited ti Provincial Government ti P120 ket iti met P80 ti ilatang ti DOLE a magun-od ti tunggal summer job student iti maysa-aldaw a panagtrabahoda. Innayon pay ni Dr. Soller a nangrugi daytoy a programa ti summer job iti arinunos ti bulan ti Marso 2013 ken maitultuloy agingga iti agdama.
Iti agdama, kaaduan nga estudiante iti agtartarabaho iti mango grafting ken dadduma pay a kasapulan iti mentenansia a maobra iti uneg ti Barang-ay Farm iti unos ti makabulan.
Innayon ni Dr. Soller a kaaduan dagiti summer job students ket agtawen ti 15 agingga iti agtawen ti 25 ken nagturpos ti high school a naggapu iti nadumaduma nga ili ti Ilocos Sur. Ingunamgunamna a kasapulan a naanus ken nagaget ken kabaelanna nga iruam ti bagina iti disso ti pagobraanda ti agtrabaho nga estudiante.
Ti Barang-ay Farm ket Agriculture Campus ti Ilocos Sur Community College (ISCC), Vigan City, Ilocos Sur. Ditoy pay ti pakasarakan ken pagpatanoran kadagiti agduduma ti klasena a mula a pagkakitaan, napatubo a kawayan, vermiculture, horticulture, hybrid ti klasena nga ayup ken dinguen a mangpatulad kadagiti mannalon ken tumulong a mangidur-as ti industria ti livestock iti Umuna a Distrito ti Ilocos Sur.
Nabiit pay a narugian dagiti panagadal- akademiko para kadagiti nakurapay ngem nasaririt nga agtutubo ket adda tallo a kurso ti agrikultura a a naluktan.
Masarakan ti disso ken pasdek ti Barang-ay Demo-Farm iti Brgy. Labnig, San Juan, Ilocos Sur. # (Web In-Action)
No comments:
Post a Comment