Cabugao, Ilocos Sur - Iti pannaki-amad ti Web In-Action idi Mayo 15, 2013, imbatad ni Mr. Nathaniel Galamgam, Organic Agriculture Focal Person-Designate ti DA-LGU nga agtultuloy ti panangkulturada kadagiti naiduma ti klasena ken abilidadna nga alinta (Night Crawler) a mangkaan kadagiti linabag ti rugit ket mapagbalin met a nabileg nga abuno iti mula dagiti takkida.
Innayon ni Mr. Galamgam a nakaprodukto ken nakalako ti 50 a sako ti vermicompost ket P6,000 ti naglakuanda kadagitoy. Agtultuloy latta ti panagtarakenda kadagiti alinta ta agdepende ti kinaregget dagiti manarawidwid kadaytoy a panangtaraon kadakuada iti kalaingda met laeng nga agrugit a mapagbalin nga abuno.Insupusop ni Mr. Galamgam nga epektibo daytoy a pataba ti mula ta tulonganna ti daga a mangisubli kadagiti napukaw a natural/kangrunaan a ramen a pagtaraon dagiti mulmula.
Ti Vermicompost/Vermiculture ket paset ti programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ti Departamento ti Agrikultura (DA) tapno masursuruan dagiti mannalon nga agusar itoy a napagbalin payen a linteg nga aramiden dagiti mannalon tapno maibaba ti gastosda iti mausar iti panagmulada ket maingato ti masapulanda iti panagtalon ken trabaho-agrikultura. # (Web In-Action)
No comments:
Post a Comment