Cabugao, Ilocos Sur – Agtultuloy a maisayangkat ti panagbakuna ti Anti-rabies kadagiti taraken nga aso (uken ken dadakkel) nga iwaywayat ni Municipal Livestock Inspector Dr. Melvin Castro, DVD ken dagiti kaduana kadagiti barangay iti Munisipalidad.Iti pannaki-amad ti Web In-Action idi Mayo 22, 2013, imbatad ni Dr. Castro a mabalinna a yeskediul ti maysa a sangkarantaan a panagbakunana no adda 10 nga aso nga aggigiddan a mapanna bakunaan. Insupusop ni Dr. Castro a malaksid nga agbakuna ti atupagenna, uray aldaw ti Sabado ken Domingo no kasapulanda ti serbisio ti pannakaagas dagiti masakit nga ayup ken dinguen ket ikagumaananna a mapan asikasuen ida.
Ti Livestock Inspection ket sanga ti DA-LGU nga imatonan ni Dr. Castro, Beterinario, a mangkita ti pagsaysayaatan dagiti animales ken dinguen dagiti mannalon a makatulong pay iti pannakaingato ti matgedan dagiti mannalon babaen iti mapaglakuanda kadagiti dinguenda. # (Web In-Action)
No comments:
Post a Comment