RAMIT-AGRIKULTURA KEN GANAGAN, NAITED ITI BRGY. PUG-OS

Cabugao, Ilocos Sur -  Nai-turn over   dagiti naited a ramit-agrikultura  ken power generators  kasta met dagiti ganagan (Ammonium Sulfate ken Organic Fertilizers), iti asosasion dagiti  mannalon ken bumarangay iti Barangay Pug-os, Cabugao, Ilocos Sur idi Mayo 19, 2013 iti asideg ti Barangay Hall iti nadakamat a barangay.

Mismo a ni Mayor Edgardo “Ediboy” S. Cobangbang, Jr. ti nangimatang ken  nangiyallawat iti panagikut dagiti mannalon ken bumarangay kadagitoy a naipaay a proyekto manipud iti LGU-Cabugao.

Buklen dagiti naited iti agsinsin a motorized thresher ti barangay ken Farmer’s Association, dua a water generator (agsinsinda pay)  ken maysa a power generator, ken dua a ganagan (1-bag  Ammonium Sulfate ken 1-bag organic fertilizer) ti tunggal  ID Holder Farmer.

Impeksa ni Brgy. Captain Arnold “Bambi” Yangat ti nalaus a panagyamanda ken  iti bumarangay iti Gobierno Munisipal nga idauluan ni Mayor Ediboy   kadagitoy a naipaay a pagsayaatan ti taga-Brgy. Pug-os. Innayonna a supsupapakanda met dagitoy  iti napintas a panagbabarangayda ken  pannakipagilida ken ti agtultuloy a panagtutunosda a lumugar para iti sapasap a pagimbaganda.

Nagyaman met ni Mr. Elmer Guerrero Bromeo, Presidente ti FA, ta naipaayanda ti aruaten nga agtalon ket inkumitna nga aywananda   dagitoy ken para iti sapasap ti pannakaiserbida.

Iti mensahe ni Mayor Ediboy, kimmablaaw ken pinagyamananna met iti naisangsangayan a  panagtitimpuyog dagiti agindeg ti Brgy. Pug-os ta amin a yusuatda para iti barangay-da ket naballigi kas ipasimudaag iti agraraay  a pammadayaw ken balligi a nagun-odda iti tay-ak ti salip ken proyekto.

Innayon pay  ti Alkalde Munisipal a manteneren koma ti Brgy. Pug-os daytoy a galadna ket no matulad ti dadduma a barangay ti talugadingna ket ad-adda manen ti pannakaidayaw  ken maragpat a progreso ti ili ken barangay ita ken iti masanguanan.

Sakbayna, kadua ni Mayor Ediboy ni Municipal Engineer Crescencio C. Formoso ken Mr. Obas Bill Y. Baclig, AT-DA LGU agraman dagiti Opisiales ti mannalon ti Pug-os, Bato ken Reppa-ac a nangbisita iti manamnama a pakaaramidan ti water impounding project iti Creek iti nagbedngan ti Brgy. Pug-os, Cabugao ken Brgy. Pug-os, Sinait. Paset daytoy iti naaprobaranen a proyekto ti minidam babaen ti DA  a maipaay kadagiti mannalon ditoy a deppaar ti ili.

Kamaudiananna, immasistir dagiti Opisiales ti mannalon ken Konseho ti Barangay iti pannakaibunong dagiti subsidized fertilizers kadagiti mannalon. # (Web In-Action)