Cabugao, Ilocos Sur – Iti panagrekurida ti Web In-Action iti Mayo 9, 2013, naammuan kadagiti agindeg iti Sitio Lusong Suyo, Brgy. Baclig, Cabugao, Ilocos Sur iti pannakabukat ti sabali a panglintegan a dalan ditoy a parte ti Barangay Baclig a kumamang kadagiti barangay iti asideg ti Karayan Cabugao kas iti Brgy. Margaay ken Brgy. Namruangan.
Sakbayna, naluktan ti kalsada a namagkamang ti Sitio Lusong Suyo ken Sitio Callaguip a manamnama a mangpadaras payen ti panagiruar dagiti mannalon ti produktoda ken panagallatiwda iti pagobraanda.
Dagitoy a mainayon a pagdurdur-asan ti barangay ket nailungalong babaen iti nagkaykaysa a kalikagum ti benneg ti Barangay, Munisipal ken Gobierno Probinsial ti Ilocos Sur nga idauluan da Governor Luis “Chavit” Singson ken Vice Governor Deogracias Victor B. Savellano.
Ken kasta met a paset ti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a pannakapapintas ti dalan iti sitio ken barangay, pannakalukat ti kasapulan a kalsada iti barangay tapno agnam-ay dagiti umili a kangrunaan iti panagiruaran ti produktoda a pagbiaganda iti ili a Cabugao, Ilocos Sur. # (Web In-Action)
No comments:
Post a Comment