Cabugao, Ilocos Sur – Babaen ti naregget a liderato da Mr. Robert S. Savella, Municipal Plant and Nursery Coordinator ken MENRO Edgar S. Balangatan, AT, iti agtultuloy a pannakapatan-ay dagiti seedlings (mahogany, gmelina, guapple, Butsina (Manila Palm), Ipil-ipil, hybrid papaya, logo, langka, atis, guayabano, bittaog ken dadduma pay iti Municipal Nursery) ket komplementaranna ti programa ti Munisipio iti Environmental Management Program partikular iti Clean and Green Program nga idauluan ni MENRO Edgar S. Balangatan.
Iti pannaki-amad ti Web In-Action idi Mayo 15, 2013, imbatad ti MENRO a madadaan ita a panagtutudo para iti Tree Planting, pannakabisita ti pagdurdur-asan ti Environmental Management Program nga impaulog ni Mayor Edgardo “Ediboy” S. Cobangbang, Jr. kas iti pannakaaramid ti Nursery-da ket ikkan ti LGU ti patan-ayenda a bukel, Backyard Gardening, Herbary, Compost Pit kadagiti 33 a barangay ti ili dagiti eskuela-publika iti Munisipalidad.
Maibatay iti direktiba ti Municipal Local Executive, imbatad ni MENRO Balangatan a mapasinatnatan ti panagitungpal dagiti barangay ken eskuela itoy a naipaulog a programa ti Munisipio tapno naan-anay a matun-oyan ti kaipapanan ti programa a pakaseknan iti panangpasayaat ti aglawlaw ti ili.
Innayon pay ni MENRO Balangatan a mapatibker pay iti koordinasion iti mainaig a trabaho iti environmental programs iti coastal barangays kas iti regular coastal clean-up ken greening ken mangrove planting para iti mentenansia ken pagsayaatan iti kabaybayan.
Insupusop pay ti MENRO iti agtultuloy a koordinasion iti opisinana para iti programa ti Solid Waste Management kadagiti barangay ken iti poblasion a pakaseknan ti panagdaldalus ken panagidalimanek kadagiti basura.
Ti Environmental Management Program ket paset ti agtultuloy ken naballigi a programa ti Gobierno Munisipal nga idauluan ni Mayor Ediboy a mangkomplementar pay kadagiti dadduma a napapateg a serbisio a mangpasayaat ti kasasaad dagiti umili ti Cabugao, Ilocos Sur. # (Web Situational Report)
No comments:
Post a Comment