Cabugao, Ilocos Sur – Segun iti mapagdamagan iti DA-LGU Cabugao a naitarget ti kalawa a 2, 235 Ektaria a maraepan ita a Wet Season 2014 (Hunio-Nobiembre) ket dagitoy ti nairekord a pakabuklan daytoy a pannakaiplano:
1.Irrigated – 1,642 Ektaria ti matalon/maraepan.
2.Rainfed – 596 Ektaria ti matalon/maraepan.
3.Seed Production – 7 Ektaria.
4.Farmer’s Field School – 1.5 Ektaria.
5.Techno-Demo - .5 Ektaria - DA-LGU; 2.5 Ektaria/LGU Bayer ken Demo-Research - .5 Ektaria.
Innayon ti DA-LGU nga idauluan ni Municipal Agriculturist Zenaida S. Andrada nga adda bilang a 4,383 a Mannalon a mangsuksukay kadaytoy a maitarget a mamulaan.
Iti biang ti 596 Ektaria a Rainfed Area, agdepende ti kinasagana ken inisiatiba ti agtalon no adda madadaan nga usarenna ken pagpadanumanna tapno maikamakamna ti mulana iti kaadda pay laeng ti tudo a mangnayon a mangpatan-ay ti minulaanna. Kaaduan a makina a maipakunot iti bubon/nakali a water impounding ti mausar ken siphonic (maipakunot a hose ta nababa ti pakaipadanumanna a talon).
Iti met biang ti Irrigated, adda sursurotenda a Planting Calendar and Pattern of Planting nangruna kadagiti sinakup ti Communal Irrigation System (CIS) ken ti National Irrigation System (NIS), agpada a sanga ti National Irrigation Administration (NIA). Dakkel ti bentahe dagiti mannalon ditoy ta mabingay ti adda a danum iti kanal ken organisado ti panagpadanum ken panagtalonda ta sakup ida ti asosasion.
Kadagiti met Techno-Demo ti DA-LGU, adda nadesignaran a Teknisian a mangkitkita/mangtaming ti panagdakkel kadagiti naimula idinto ta isamirada pay nga asikasuen dagiti naimula iti Techno-Demo-Research a nagbuligan ti Pribado ken ti DA-LGU nga ipatungpal.
Dagitoy nga aksion ken inisiatiba ket maigapu iti agtultuloy a pannakaipromot ti programa ti Agrikultura iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno matun-oyan latta ti Rice Sufficiency Status para kadagiti umili ita a tawen. # (Web Situational Report)
No comments:
Post a Comment