Thursday, July 24, 2014

INTER-AGENCY ITA TI KAMPANIA KONTRA-DENGUE

Cabugao, Ilocos Sur -  Iti pannaki-amad ti Web In-Action  idi Hulio 22, 2014, imbatad ni Dr. Bernardino M. De Gracia  III, OIC Municipal Health Officer nga aksionanda  ti pakaseknan iti panagraira manen  ti lamok a dengue.

Innayon ti Doktor nga adda dua nga insidente ti dengue maibatay iti rekord  ket pakpakauna  a pakdaar nga adda sumarsaruno pay a kapten daytoy a makadidigra a sakit a nangruna a tumaud  iti matutudo a tiempo kas iti agdama.Kinuna pay ni Dr. De Gracia nga mait-ited ti rekord dagiti biktima ken pasiente ti “dengue” manipud kadagiti pribado ken pampubliko nga ospital iti ili ket iramanda  iti pakabuklan ti tignay-medikal   nga igannuatda. Iti agdama, maar-aramid ti pannakausar  dagiti OV-Trap a mangkeltay iti panagitlog dagiti lamok a naiwaras kadagiti 33 a barangay ti Munisipalidad.

Iti kasta, madagdagus a maaksionan/ mataripato ti masakit. Insupusop ni Dr. De Gracia nga aramidenda pay dagiti information drive  kontra iti dengue kadagiti barangay. 
Kabayatanna, tumultulong met ti MDRRMC nga idauluan ni Engr. Nestor B. Somera iti trabahoda nga “Oplan Taob” ket inkampaniada iti Poblasion nangruna kadagiti kabalbalayan a dida ipaturay nga adda nakawara a nataya a danum ti tudo ket kasapulan a maipattogda tapno awan ti pagitlogan dagiti lamok.

Dagitoy nga aksion ken inisiatiba ket maigapu iti nasamay a programa iti pananglapped ti  nadakamat a sakit babaen iti pannakibinnulig  ti Gobierno Munisipal kadagiti dadduma nga Ahensia ken NGO  tapno masalbar dagiti umili nangruna dagiti ubbing iti pannakakagat ti agdangran a lamok. # (Web In-Action)

No comments:

Post a Comment