OPLAN TAOB, IPAMAYSA TI MDRRMC

Cabugao, Ilocos Sur – Segun ken ni Engr. Nestor B. Somera, Opisial ti Municipal Disaster Risk Reduction Management Council (MDRRMC)  nga adda latta mainayon nga aksion ken pagdudur-asan ti panagsaganada iti idadateng ti kalamidad iti ili ti Cabugao, Ilocos Sur.

Dagiti sumaganad ti dinakamat ni Engr. Somera a progreso ti panagsaganada:

1.Maipamaysa ti Oplan Taob nga isayangkatda ita a panawen ti tudtudo ta maipakbo ti amin a saan a nasesita a  nakataya a banag tapno awan ti pagitlogan ti lamok.

2.Pannakanayon ti ramit a kas iti camera nga adda videona a maaramat no adda kalamidad.

3.Maiwayat ti panagsanay dagiti Barangay Officials ken kameng ti BDRRMC babaen iti panangtarawidwid ti LGU, Philippine National Red Cross (PNRC), DILG, BFP ken ti PNP. 

Malaksid kadagitoy a progreso ti panagsaganada, masansan a bumisita dagiti pannakabagi ti Provincial Disaster Risk Reduction Management Council (PDRRMC)-Ilocos Sur iti ili ti Cabugao tapno kakoordinarda iti MDRRMC para iti pagsayaatan ken panagtinnulong ti tumunggal maysa, segun pay ken ni Engr. Somera. # (Web In-Action)