INTER-AGENCY UPDATE PARA KADAGITI DAGITI MANNALON KEN MANGNGALAP

Cabugao, Ilocos Sur –Agsasaruno ti  pannakaiyusuat ti programa, aktibidad  ken proyekto babaen iti panangigannuat ti DA-RFO 1, OPAG-Ilocos Sur,  Gobierno Probinsial, ken iti Bureau of Fisheries and Aquatic Resources-Regional Field Office (BFAR-RFO 1) babaen iti pannakikammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr. 

Iti update manipud iti rekord ti DA-LGU, dagiti sumaganad ti itineraria iti pakauna a lawlawas ti bulan ti Hulio 2014  kadagiti maseknan a maibaon nga agseminar ket dagiti maiyawidda nga adal ket maiyallatiwto manen kadagiti mannalon/mangngalap:

1.Pannakaawis ti Municipal Cooperative Officer a nakiseminar idiay Vigan City tapno mapasingkedan ti partnership dagiti mabuangay/nabuangayen a Kooperatiba ti ili a mangbenepisiar iti Cooperative Sector babaen kadagiti proyekto ken programa nga iyusuatda.

2.Hulio 11, 2014 idi naangay ti miting ti Municipal 4-H Coordinator ken Opisiales ti Municipal 4-H Club Federation iti Cabugao babaen iti awis ni Vice Governor DV Savellano iti Gobierno Probinsial tapno mapatibker/mareorganisar ti 4-H Club ken maiyuna kadakuada ti pannakaigannuat ti livelihood training ti Bamboo Production ken kanaigna a proyekto. Naaramid daytoy a panagmiting  idiay CABANA Beach Resort, Brgy. Pug-os, Cabugao, Ilocos Sur.

3.Maaramid ti 3-Day Course on Cassava Production and Post-Harvest Technology inton Hulio 23-25, 2014 idiay DA-ATI Center, Sta. Barbara, Pangasinan a pakaibaonan ti maysa Teknisian ti DA-LGU a mangiggem ti Corn Cassava Banner Program. Napateg daytoy a seminar ta maadal ti baro a wagas ti panagprodukto ti Cassava (Balinghoy wenno Kahoy) kas katukad ti bagas gapu iti panagnginana  nga staple food. Daytoy ti nasakbay a pakaammo ni ATI Center Chief Rogelio C. Evangeslista, DPA, iti nasao nga Opisina.

4.Pannakaawis ti High Value Crop Development Program Coordinator (HVCDP) ti ili a makimiting idiay Office of the Provincial Agriculture Office (OPAG-Ilocos Sur) ta maisuro iti Field Demonstration iti Preparasion ti Rainshelter a maaramid idiay Demo-Farm ti Banayoyo, Ilocos Sur. Daytoy a gannuat ket   pagbuligan ti DA-RFO 1 ken ti OPAG-Ilocos Sur a mangisuro  iti panagipasdek ti Rainshelter a maisuro  met kadagiti mannalon ken agmulmula ti nateng kalpasanna. # (Web In-Action)