Cabugao, Ilocos Sur - Iti pannaki-amad ti Web In-Action idi Hulio 14, 2014, impakaammo ni Dr. Bernardino M. de Gracia III, OIC Municipal Health Officer ti ili a Cabugao a kalikagumanna a maaksionan a dagus no adda pakaseknan maipapan iti panagtaud ti lamok a makadangran a mangapektar ti salun-at dagiti umili ti Cabugao.
Gapu itoy, kinasarita ni Dr. De Gracia ti amin a Medical Personnel iti RHU-Cabugao nga ukkonenda ti record iti pakaseknan iti daytoy a sakit manipud kadagiti barangay ken kadagiti pribado nga ospital iti ili tapno mairamanda iti pakabuklan ti tignay-medikal a maigannuat. Iti agdama, napasangpeten ti 2,000 nga Oviposition (OV)-Trap nga impaay ti DOH Regional Office 1 ken ti LGU-Cabugao iti RHU-Cabugao para iti daytoy a pakaseknan ti salun-at. Innayon ni Dr. De Gracia a babaen iti pannakaasikaso ti masakit iti dengue ket masigud a maagasan tapno saan a mapakaruan ti maseknan.
Insupusop ni Dr. De Gracia nga aramidenda dagiti information initiatives kontra iti dengue. Panagdaldalus ti aglawlaw ken iti pagtaengan, panangipakbo dagiti nagurnongan ti danum ken madalusan dagiti nasamek a disso a posible a pagyanan ti lamok ti kaskenan a praktikal a a wagas maaramid ita.
Dagitoy nga aksion ken inisiatiba ket maaramid babaen iti nasamay a programa babaen iti agtultuloy a pannakikammayet ti LGU-Cabugao kadagiti maseknan nga Ahensia/Opisina kas iti DOH iti pannakalapped ti panagsaknap ti nadakamat a sakit. # (Web In-Action)
No comments:
Post a Comment