Cabugao, Ilocos Sur –Agtigtignay latta ti puersa ti Municipal Disaster Risk Reduction and Management Council (MDRRMC) nga ibagian da Engr. Nestor B. Somera ken Engr. Crescencio C. Formoso agraman iti Skeletal Force ti LGU-Cabugao no adda mamonitorda a sumungad a bagyo weno kalamidad. Iti iseserrek ti Bagyo Glenda ken ni Henry iti Area of responsibility ti pagilian ket nangibunga laeng ti napigsa a tudtudo ditoy Ilokos a nangpabor ketdi iti pannakasapul dagiti mannalon iti danum a pagtalonda.
Malaksid ti panagmonitorda, mapanda met kadagiti calamity prone area (inland ken coastal area) tapno agdamagda/mamakdaarda ken maaramid ti information drive kadagiti paguummongan ti tao iti barangay ken poblasion.
Daytoy a panagsagana ket naibasar iti pannakaibayog ti obserbasion ti “National Disaster Preparedness Month” iti bulan ti Hulio 2014 ke kakinnammayet ti MDRRMC dagiti kabinuligna nga Opisina ken Ahensia ti Gobierno a masakupan met iti NDRRMC, RDRRMC ken PDRRMC-Ilocos Sur iti panangpasungadda ti isasangbay dagiti kalamidad a kas iti bagyo, nakaro a tudtudo, layus, uram ken kanaigna a didigra.
Iti pannakiuman ti Web In-Action idi Hulio 22, 2014, imbatad ni Engr. Nestor B. Somera a malaksid iti panangalertoda kadagiti kakaduada a mangbukel ti MDRRMC iti Munisipio nga agmobilisar/agmonitor manipud iti aw-away agingga iti Poblasion, imbatadna pay a nabulanos ti panagtaray dagiti danum iti wawaig gapu iti pannaka-dredge (mawayaan) dagiti Creeks iti Poblasion ken naibagbagana met kadagiti barangay kadagiti kameng ti BDRRMC-da.
Innayon pay ni Engr. Somera a pumartak ita ti mobilisasionda ta maigapu iti pannakagatang ti 10 a Hand-held Radio-da malaksid iti Hotline Numbers-da ken Cellphones a maaramat para iti komunikasion no adda kalamidad a mapasamak.
Dagitoy nga aksion ken inisiatiba ket maigapu latta iti napartak a panangipatungpal ti pagrebbengan iti panawen ti emerhensia tapno maprotektaran dagiti umili babaen iti panangikalikagum ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mapakadaan ken maalay-ayan ti epekto dagiti dumteng a kalamidad no adda man. # (Web Situational Report)
No comments:
Post a Comment