Cabugao, Ilocos Sur – Segun ken ni Fire Marshal BFP Inspector Elmer C. Acapuyan, nga agtultuloy dagiti aktibidadesda iti Information Dissemination, Fire Drill ken Inspection kadagiti government establishment kadagiti barangay ken iti poblasion iti uneg ti makatawen. Sakbayna, naaramid ti Motorcade iti pannakairubuat ti Emergency and Disaster Preparedness Month ita a bulan ti Hulio 2014 itay nabiit.
Innayon pay ti Fire Marshal a paset ti programa ti Opisinada iti agtultuloy a panangpalagip/panangyadalda kadagiti tattao iti umisu a panagusaran ti kandela iti uneg ti pagtaengan kasta met kadagiti uneg ti establisimiento nangruna no ag-brown out ti koriente a masansan a pangrugian ti uram gapu iti di napakpakadaan a panagliway dagiti naseknan.
Innayon pay ni BFP Inspector Elmer Acapuyan nga assideg ti koordinasionda iti Municipal Disaster Risk Reduction Management Council (MDRRMC) - LGU Cabugao ken kaduada ti Municipal Engineering Office iti inspection dagiti pasdek sakbay a mainstolaranda iti elektrisidad.
Ita pay, segun iti Fire Marshal a sansanayenda manen dagiti Fire Brigade Core Members para iti mapaspasangasangan a Regional Fire Olympics 2014 ket impeksa ni Inspector Acapuyan iti panagyamanda iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a suportada kadagiti programa/aktibidad ti BFP a maipatungpal a mangprotektar kadagiti umili iti didigra ti uram. # (Web In-Action)
No comments:
Post a Comment