Cabugao, Ilocos Sur – Iti pannaki-amad ti Web In-Action idi Hulio 3, 2014, imbatad dagiti kaaduan nga agtaltalon iti nadumaduma a disso ti ili a di pay naparuar ti husto nga ubbog iti nagsasaganad a tudtudona kadagiti pagtatalonanda iti matapogan ti bulan ti Hunio-Hulio 2014.
Nupay kasta, mangin-inut met dagiti adda irigasionna ken adda bubon wenno small farm reservoir-da, ket saanda a madanagan ta madadaan dagiti makinaria nga impaay ti LGU-Cabugao kasta met dagiti hose a pagsisinnublatanda nga usaren tapno mapadanumanda ti paraepanda/naraepanda.
Innayonda a daytoy ti bentahe iti kaadda ti makinaria, tractor, hose a kangrunaan a kasapulan iti land preparations ta malag-ananda ken maidaras ti panagtalonda nangruna no abutenda ti adda a danum a kasapulanda.
Kabayatanna, impakaammo ni Municipal Rice Program Coordinator Nereo S. Daproza, AT a madama pay laeng iti panagbisitana kadagiti pagtatalonan kadagiti barangay iti intero a Munisipalidad tapno agmonitor ken maammuanna ti bilang ti nakatalonen, saan pay a nakatalon ken awan pay ti rugina.
Nupay kasta, innayon ni Daproza nga iti kaadda ti makinaria a mausar ken iti masansan a panagtudona ket manamnama a mabassitan dagiti mannalon ti mulaanda a nangruna kadagiti rainfed area.
Dakkel ti pammati ni Daproza a babaen iti kinaregget dagiti mannalon ket mamantener ti bilang ti matalon kas iti napalabas a panagtalon iti Wet Season 2013 (Hunio-Nobiembre).
Insupusop ni Daproza a kanayon met a bisitaenna dagiti disso ti Techno-Demo ti Munisipio tapno maiwanwanna dagiti mannalon.
Dagitoy nga aksion ket maigapu iti agtultuloy a programa ti LGU-Cabugao iti Agrikultura iti panangidaulo ni Mayor Edgardo “Ediboy” S. Cobangbang, Jr. tapno mamantener ti “Rice Sufficiency Status” para kadagiti umili ti Cabugao, Ilocos Sur. # (Web Situational Report)
No comments:
Post a Comment