Thursday, July 10, 2014

NAKAALERTO LATTA TI MDRRMC

Cabugao, Ilocos Sur – Segun ken ni Engr. Nestor B. Somera, Opisial ti Municipal Disaster Reduction Risk Management Council (MDRRMC) a nakasaganada latta kadagiti emerhensia a tumaud no dumteng ti kalamidad. 
Malaksid a naka-stand by  dagiti ramit ken epektos nga usarenda nga adda ita a naideposito iti Operation Center ti MDRRMC a masarakan iti Munisipio, kitkitaenda pay no kasano a maka-koordinarda a nasayaat kadagiti Opisina iti MHO-RHU, BFP, ken MENRO a support unit ti konseho no adda kalamidad.

Kabayatanna, innayon ni Engr. Somera a maibilang met a parte ti pannakadidigra dagiti nagrukaben  ti unegna a dadakkel a kayo kas iti pinuon ti akasia iti igid ti kalsada nasional. Insupusopna a kaduadanto  ti MENRO a mangtingiting kadagitoy a nalakayanen a kaykayo ta adda dagiti napasamak nga agatutuang dagiti pinuon a nakaperhuisio ti panagdaliasat ken napegpeggad no adda mapandaganna.

Imbatad  pay ni Engr. Somera a nakasagana pay ti puersa ti MDRRMC kadagiti lugan para iti mobilisasion ken dagiti Hotlines Numbers  (0917-7995565) wenno 604-0063 a mabalin a kontakenda   no ingkaso nga adda mapasamak a kalamidad iti ikub ti Munisipalidad. Iti agdama, gimmatang ti MDRRMC iti 10 Units ti Hand-held Radio a karaman ti Base a kas pangnayon iti kabaelan ti grupo a mangaksion kadagiti pakaseknan dagiti umili iti panawen ti didigra. # (Web In-Action)

No comments:

Post a Comment