Cabugao, Ilocos Sur – Iti panagbuslon ti tudo iti kangrunaan a pagbatayanda ken mangikeddeng ti pannnakalpas ti panagtalonda iti Wet Season 2014 (Hunio-Nobiembre), segun iti kaaduan a Mannalon nangruna iti rainfed area. Naammuan pay a kaaduan ita ti manam-ayan iti kaadda ti naited kadakuada a pagsusublatanda a ramit a pagtalon kas iti tractor, kuliglig, hose ken makina a pagpakunot ti danum babaen iti Gobierno Munisipal ti ili a Cabugao a nausar manipud iti panagbunubonda ken mausar pay iti panangpadakkeldanto iti nairaepda.
Maibasar iti tignay ti DA-LGU Cabugao maipapan iti daytoy a panagtalon, imbatad ni Municipal Rice Program Coordinator Nereo S. Daproza a kaaduanen dagiti mannalon iti naikkan ti pamalpalatpatan iti Cropping Calendar & Pattern of Planting iti Wet Season 2014 babaen kadagiti naaramid a meeting ken Technical Briefing ken Palay Check Session.
Innayon ni Mr. Daproza a manamnama a mamantener ti bilang ti matalon maikompara iti kallabes a 2013 iti intero a Munisipalidad. Kanaig daytoy, nailunsaden dagiti Municipal Techno-Demo Farms ken kasta metten iti Farmer’s Field School (FFS) in Rice Production kadagiti strategic areas tapno adda pagtuladan dagiti mannalon.
Iti agdama, mapatta-patta a maraepan iti nai-target ti DA-LGU a matalon iti Wet Season 2014 iti bulan ti Agosto 2014, segun pay ken ni Mr. Daproza.
Dagitoy nga aksion ken inisiatiba ket maigapu iti napintek a programa iti Agrikultura ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agtultuloy a mapataud ti umanay a suplay a pagtaraon dagiti umili ken manayonan ti masapulanda a mayoridad iti kangrunaan a pagbiaganda iti Agrikultura. # (Web Situational Report)
No comments:
Post a Comment