Wednesday, July 23, 2014

SYNCHRONIZED TREE PLANTING, IDAULUAN TI NTA-CABUGAO

Cabugao, Ilocos Sur – Maiyusuat ti Synchronized Tree Planting Activity nga idauluan ti National Tobacco Administration-Cabugao Area nga idauluan ni Mr. Tomasito C.  Taloza, OIC, NTA Cabugao Area inton Hulio 30, 2014  ket manamnama a maangay nga aggigiddan ti nasao nga aktibidad iti 26 a barangay ti ili a Cabugao, Ilocos Sur.

Segun ken ni Mr. Lawrence R. Bueno, Tobacco Production Regulations Officer 1, NTA –Cabugao Area, a nakipagkoordinar  kadagiti Kakapitanes ti ili iti binulan a mitingda iti Municipal Conference Building ket inlawlawagna pay ti dadduma a programa ken serbisio nga itden  ti Ahensia ti NTA kadagiti umili. Kangrunaan a pinasingkedanna iti pannakaangay ti Synchronized Tree Planting inton Hulio 30, 2014 kadagiti barangay.

Sakbay daytoy, naiwayat  ti nasaknap a Tree Planting Activity iti Ahensia iti kallabes a Tawen ket nawarasan dagiti barangay iti Ipil-ipil Seedlings a nagkumit a tumulong iti nasao a panggep. 

Segun pay ken ni Mr. Bueno, nakapokus ti Opisinada kadagiti serbisioda kadagiti mannalon babaen kadagiti programada a kas iti sumaganad:

Tobacco Contract Growing – addan 90% a nakolektada iti naipabulod kadaggiti mannalon iti napalabas a Tobacco Season.

Rice  Production  Loan kadagiti mannalon iti umabot ti 8.5 ektaria a kalawa ken P12,000 ti mabatayan ti tunggal ektaria, segun ken ni Mr. Bueno.

3 nga Eskolar ti Opisina ti NTA nga annak ti Tobacco Farmers iti Cabugao Area.

Baboyan (Hog Fattening) iti Brgy. Sagayaden-Based ken nainayon iti Barangay Aragan.

Multi-purpose Curing Barn – kaaduan ti NTA Model nga urno a napatakder idiay Barangay Sisim. Mabalin pay a pagbilagan ti irik ta adda naited a dakkel a  Tray a maibitin iti uneg ti urno sakbay a maaronan. # (Web In-Action)

No comments:

Post a Comment