Cabugao, Ilocos Sur – Iyuna ti Local Government Unit (LGU)-Cabugao nga idauluan ni Mayor Edgardo “Ediboy” S. Cobangbang, Jr. ket makikaysa iti amin nga Ahensia/Opisina ken iti sapasap nga umili iti pannakaobserbar ti Nutrition Month iti bulan ti Hulio 2014.
Iti pannakiuman ti Web In-Action idi Hulio 6, 2014, impakaammo ni Municipal Nutrition Action Officer Joenah G. Sevilleja a naangay ti miting dagiti Barangay Nutrition Scholars (BNS) iti 33 a barangay ket trinatarda dagiti mayataday nga aktibidad a maigannuat iti bulan ti Hulio 2014 ken maki-koordinarda met kadagiti 26 a pageskuelaan ti Munisipalidad.
Kaduada ti Opisina ti Municipal Operation Office (MOO) ti 4 P’s Program, Municipal Link-Cabugao a mangirakrakurak kadagiti pakabuklan ti programa ti Nutrision.
Innayon ni Mrs. Sevilleja a makiko-koordinarda met kadagiti Opisiales ti barangay a katinnulongda nga agipatungpal.
Kabayatanna, mabukbukel ti pagalagadan iti implementasion ti Supplementary Feeding Program ti DSWD-MSWDO para iti Day Care Center kadagiti barangay a mangrugi iti bulan ti Agosto 2014, segun ken ni Mrs. Lydia S. Gazmen, Municipal Social Welfare Development Officer.
Agtultuloy met ti Information Dissemination maipapan iti Nutrition Program kadagiti 4 P’s Members kadagiti barangay babaen kadagiti Staff ti 4 P’s Municipal Link.
Kanaig daytoy, makipagselebrar ti LGU-Cabugao iti Nutrition Month 2014 babaen iti Tema: “Kalamidad Paghandaan: Gutom at Malnutrisyon agapan!”
Dagitoy nga aksion ket maigapu iti agtultuloy a panangilungalong ti Gobierno Munisipal a mapagkaysa ti puersa ti Municipal Nutrition Council Committee, Barangay Councils, MSWDO, 4 P’s-Municipal Link, MHO-RHU ken iti pannakabagi ti DOH a mangipaganetget iti maaramid ti programa kadagiti barangay tapno maragpat ti sapasap a panggep iti pananglapped ti malnutrision. # (Web In-Action)
No comments:
Post a Comment