MASELSELSEBRARAN TI INALDAW TI NUTRITION MONTH

Cabugao, Ilocos Sur – Ti Local Government  Unit (LGU)-Cabugao nga idauluan ni Mayor Edgardo “Ediboy” S. Cobangbang, Jr.  ket makikaysa iti  amin nga Ahensia/Opisina  ken iti sapasap iti pannakaobserbar ti kaipapanan  ti Nutrition Month iti bulan ti Hulio 2014 babaen iti Tema: “Kalamidad Paghandaan: Gutom at Malnutrisyon Agapan!”. 

Babaen itoy, nagkakammayet dagiti nadumaduma a Departamento ti LGU agraman dagiti Ahensia a kas iti Philippine National Police (PNP)-Cabugao Municipal Police Station  iti programana a  “Feeding Program” a paset ti aktibidadda iti Police Community Relations Month 2014 kasta met iti  Supplemental Feeding Program          ti Day Care Center a maipatungpal iti bulan ti Agosto 2014, segun ken ni MSWD Officer Mrs. Lydia S. Gazmen. Iti benneg ti  pageskuelaan, maisangrat ti 35 % ti Proceeds dagiti School Canteen iti Feeding Program iti Severely Undernourished Pupils iti dayta a pagadalan, segun ken ni Ms. Anabelle R. Ancheta,   District Nutrition Coordinator.

Iti pannakiuman ti Web In-Action kadagiti Barangay Nutrition Scholars (BNS)  iti panagtitiponda iti binulan a mitingda iti Munisipio itay nabiit, imbatadda  a dadduma nga aktibidad ti maigannuat iti bulan ti Hulio  2014 kadagiti 33 a barangay ken 26 a pageskuelaan ti Munisipalidad ket iti  Backyard/home, school and Community Gardening, Mother’s Class, Nutrition Education,  Pabasa sa Nutrisyon ken  Supplemental Feeding ti dadduma nga ubbing nga  adda rekordna iti mal-nutrision.

Innayonda  a makiko-koordinarda met kadagiti Opisiales ti barangay iti pannakaipatungpal dagiti nadakamat nga aktibidades. 

Dagitoy nga aksion ken inisiatiba ket maigapu iti agtultuloy  a panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mapagkaykaysa ti  puersa a sakupen ti  Municipal Nutrition Council Committee nga idauluanna  kadagiti  Barangay Councils/Officials, MSWDO, MHO-RHU ken  ti pannakabagi ti DOH a mangipaganetget ti sagudayen ti programa kadagiti barangay tapno matun-oyan ti kangrunaan a turongen ti pananglapped ti malnutrision  ken panangikkat ti panagbisin dagiti ubbing ken inna. # (Web In-Action)