INTER-AGENCY TEAM WINNERS, NAITED DAGITI TROPEODA

Cabugao, Ilocos Sur – Kalpasan ti Flag Raising Ceremony iti Hulio 7, 2014, naiyawat dagiti Tropeo dagiti nangabak iti kalleppas nga Inter-Agency Basketball Tournament 2014 iti LGU-Cabugao, Ilocos Sur. Mismo a ni Mayor Edgardo “Ediboy” S. Cobangbang, Jr. ti nangiyawat kadagiti Tropeo ken nayonna a Premio iti imatang dagiti  Opisiales ti Gobierno Munisipal ken kameng ti Pamilia-LGU  iti daytoy  a petsa.

Dagiti nagballigi iti nadakamat a paay-ayam: Municipal Police Station – Champion; Vice Mayor Team – 1st Runner-up; Bureau of Fire Protection Team – 2nd Runner-up; Mayor’s   Team – 3rd Runner-up.

Iti panagsarita ni Mayor Ediboy, kimmablaaw ken nagyaman iti balligi ken suporta dagiti nagbuya kadaytoy a naaramid a paliga ti Munisipio. Innayon ti Ama ti Ili a kayatna a mapalawa ti partisipasion dagiti Opisina ken Ahensia nga adda iti salinong ti LGU. Impakaammona a mairaman ti benneg ti babbai kadaytoy a paliga babaen kadagiti sport events a mayataday kadakuada. Maragsakan a nangipadamag a kayat dagiti NGO’s iti makiraman kadaytoy a paliga. Insupusop ti Municipal Chief Executive iti agtultuloy a pannakapasayaat dagiti pasilidad ti sports iti ili  tapno adda pagsanayan ken pakaangayan dagiti mainayon a paay-ayam  ken agtultuloy a  mangipromot iti napintas a panaglalangen ken iti pisikal a pagimbagan dagiti umili. # (Web In-Action)