BLESSING AND LAUNCHING TI BRGY. FOOD TERMINAL, NAARAMID

Cabugao, Ilocos  Sur – Naaramid ti Blessing ken Launching ti Barangay Food Terminal ti Barangay Dardarat, Cabugao, Ilocos Sur iti Hulio 18, 2014 iti Barangay Covered Court iti nasao a barangay.

Sakbayna, naaramid ti 2-Day (Hulio 16-17, 2014) Seminar iti 52 a katao (4 P’s Members, Barangay Officials ken RIC) iti Meat and Fish Processing babaen iti panangyadal ti nagkammayet a grupo ti DA-RFO 1, OPAG-Ilocos Sur ken ti BFAR RFO 1 a nangbukel kadagiti Trainors tapno maikkanda ti pannakaammo iti panangmanehar ti panaglako/panagaramidan ti mainayon a mailako  iti Barangay Food Terminal a tarawidwidan ti Barangay Council nga idauluan ni Brgy. Captain Charles F. Garcia. 

Iti bigat ti Biernes, Hulio 18, 2014,  naangay ti programa iti Covered Court a nagatendaran dagiti nagseminar, bumarangay, Opisiales ti Barangay ken ti Munisipal kasta metten  dagiti pannakabagi dagiti Ahensia a karaman kadaytoy a pasamak kas iti DA-RFO 1, BFAR RFO 1, OPAG-Ilocos Sur, ken ti DA-LGU Cabugao.

Kalpasan ti Kararag ken pannakakanta ti National Anthem, linuktan ni Municipal Agriculturist Zenaida S. Andrada ti programa. Kimmablaaw ken nagyaman kadagiti Ahensia/Opisina  ti Gobierno a nangipaay kadaytoy a pagnam-ayan ti Barangay Dardarat.

Iti Welcome Remarks ni Vice Mayor Deogracias Jose Victorino H. Savellano, kimmablaaw, nagyaman kadaytoy naited a proyekto. Kunana a maaywanan koma a husto ti pasilidad ta dakkel ti maitulongna kadagiti nakurapay a kaamaan. Innayon ti Vice Mayor nga usarenda ti maadalda tapno maital-o ti produkto  para iti napintas a merkado ken makatulong iti global competitiveness.

Imbagian ni Mr. Dario Doctolero ni BFAR RFO 1 Director Nestor Domenden, CESO V ket nangted ti mensahe para iti sapasap. Imbagian met da Ms. Wima Ibea,  Center Chief ti Ilocos Norte Research and Experiment Center (INREC) ni OIC Regional Executive Director Valentin C. Perdido, Ph. D. Ni met Mr. Teofilo R. Quintal ti  nangibagi ken ni Governor Ryan Luis V. Singson. Kangrunaan nga anag ti mensaheda iti panangapresiarda ti  napintas a pannakisinnabat ti Gobierno Lokal kadagiti programa ti DA ken Gobierno Probinsial iti benneg ti Farm Mechanization Program, Organic Production  ken iti pasalip ti DA kas iti National Rice Achiever’s Award ken Gawad Saka. Kuna ni Mrs. Ibea a nagballigi ti ili a Cabugao iti pannakapilina a  National Awardee iti National Rice Achiever’s Award iti 2013.  Iti kaadda ti Barangay Food Terminal ti Barangay Dardarat ket potensial a maisalip iti Gawad Saka agsipud ta kasapulan iti indicator ti salip  iti maysa a pasilidad a kas iti Barangay Food Terminal, segun ken ni Ms. Ibea.

Nangipaay met ti Mensahe ni SBM Benedicto M. Savellano, Committee Chair on Agriculture, Fishery and Cooperatives  para kadagiti nagsanay ken mangmanehar kadaytoy a pasilidad. Pinagyamananna ti nasayaat a panagkakammayet dagiti Ahensia ken Opisina tapno agballigi daytoy a proyekto iti nasao a barangay.

Kalpasan ti programa, naaramid ti Blessing iti napabaro a pasdek ti Barangay Food Terminal babaen iti panangannong ng Bro. Fermin Sesuca. Ginetteng da Vice Mayor DJ Savellano ken ni Mrs. Wilma Ibea ti laso a nangipalnaad ti pannakaisibro ti nasao a pasilidad.

Kamaudiananna, naiyawat ti Sertipiko a mangipakita nga iti Konseho ti Barangay ti mangoperar ti nasao a Barangay Food Terminal manipud iti DA-RFO 1. Nagyaman ni Kapitan Charles F. Garcia kadagiti amin nga Ahensia ken Opisina a nakitinnulong iti pannakapaadda kadaytoy a proyekto iti Barangay Dardarat. Inawisna dagiti kabarangayanna nga aywanan ken taripatuenda a naimbag daytoy a naited a pagnam-ayanda.

Nakikaysa met da SBM Danny Q. Gazmen; SBM Dr. Jemaima S. Tan-Yee;  SBM Atty. Bryan Jett S. Pano ken ni MFARMC Chairman Danny S. Garcia iti nasao a Launching Program.  # (Web In-Action)