Kaaduan a paboran ti tiempo ket nabuslon pay laeng ti danum a mausar nga aggapu iti puttotda iti baba ti Rangtay Alina-ay ti Cabugao River nga usarenda a mangpatan-ay kadagiti mulada manipud iti bulan ti Hunio agingga iti bulan ti Pebrero a panagapitda iti kada tawen.
Kabayatanna, makatulong unay dagiti irrigation canals a naaramid babaen iti panangipatungpal ti barangay nga idauluan ni Brgy. Captain Edgardo Celestino G. Sonido ti Brgy. Turod Patac iti kallabes ken timmulong ti Gobierno Lokal ti ili a Cabugao, Ilocos Sur nga idauluan ni Mayor Edgardo “Ediboy” S. Cobangbang, Jr. iti pannakaaramid dagitoy a kanal a namagkakamang kadagiti nalawa a sinilong iti nasao a disso ti pagtatalonanda.
Kalpasan ti panagapit iti 2nd Crop iti bulan ti Pebrero, mamulaanto manen ti sandia, mais, nateng ken tabako dagitoy a natalon ket tuloy-tuloy ti produksion ti pagtatalonanda.
Naaramiden ti Farmer’s Field Day dagiti mannalon iti Brgy. Turod Patac, Cabugao, Ilocos Sur idi Oktubre 27, 2011 nga inesponsoran ti SL Agritech Corporation ken tinarabay ti Konseho ti Barangay nga idauluan ni Brgy. Captain Edgardo Celestino Sonido.
Timmulong met a nangiwardas daytoy nga aktibidad ni Mr. Nerio S. Daproza, Municipal Rice Program Coordinator a kas paset ti programa ti DA-LGU ken Gobierno Munisipal nga idauluan ni Mayor Edgardo “Ediboy” S. Cobangbang, Jr.
Segun ken ni Mr. Nordito Surtido, inabrasa a dagus dagiti mannalon ditoy ti panagmula ti Hybrid Rice manipud idi 2001 a pannakaisaknap ti panagmula ti Hybrid. Karkulasionna ket agarup 15% laengen ti agmulmula ti inbred ditoy a barangay.
Iti programa, nagatendar ni madama idi a Vice Mayor Danny Q. Gazmen ket kimmablaaw ken nagyaman ta adda dagiti korporasion a mangidanon ti mapabpabaro a teknolohia ken wagas ti panagpaadu ti apit a kalkalikaguman met ti Gobierno Munisipal.
Naannayas ti lektiur, miting, ken diskusion a porma ti programa ket ditoy nga imbatad ni Brgy. Captain ni Edgardo Celestino Sonido a nakapagmula met ti 50 kilos a Hybrid a kas pangdanggayna kadagiti kabarangayanna ket inallukoyna ti Management ti SL Agritech Corporation nga iwayatna latta ti programana ti Hybrid iti lugarda yantangay sisasagana ti 100 ektaria a maraepan ti Hybrid iti main crop ken natibker ken natudio dagiti kalugaranna a mannalon a makigamulo kadaytoy a gay-at. Kiniddaw pay ni Kapitan Sonido ti crop loan iti inputs manipud iti korporasion.
Nagatendar met idi da Mrs. Zenaida S. Andrada, Municipal Agriculturist ken kakaduana iti DA-LGU, MAFC Chairman Rogelio Barlolong, Federated Farmers’ President Elmer G. Bromeo, dagiti agmulmula ti Hybrid iti nadumaduma a barangay ti ili ti Cabugao tapno makipagadalda kadagiti naballigi a wagas ti panagmula ti Hybrid iti pagdindinamagan a “Barangay Top Producer” ti Hybrid Rice ti Barangay Turod-Patac kas naibaga dagiti taga-DA-LGU.
Nagun-od pay ti Turod Patac Farmers Association ti Outdoor Storage (Hermotic Cocoon C) iti Programa ti Corn Machinery/Postharvest Facility Program ti Department of Agriculture, Regional Field Unit 1, San Fernando City, La Union idi Nobiembre 13, 2012.
Daytoy a alikamen-pagabbong ket nalawa ti pakaukradanna ken kabaelanna a laonen ken pagpempenan ti 100 sacks a pagay/mais @ 50 kgs. a makamada iti 1.50 meter ti kangato tapno maprotektaran iti agkaan a billit ken insekto iti tengnga ti bangkag ken kataltalonan. Babaen itoy, mapreserba ti produkto iti ideal a moisture content (MC) ken maliklikan ti gastos ken bannog nga agyakar-akar ti maapit kabayatan a maisagsagana ti pannakailakona, segun ken ni Mr. Nereo Somera Daproza, OIC, DA-LGU
Sakbay a naiyawat kadagiti mabenepisiaran nga asosasion, naangay ti ababa a programa ken Technical Briefing dagiti mangimatmaton ti programa tapno matarusan dagiti mannalon ti usar daytoy a ramit.
Kadua ni Mr. Nereo S. Daproza idi ni Brgy. Captain Edgardo Celestino Sonido, nangidaulo kadagiti miembros ti Turod Patac FA a nagatendar iti pannakaiyawat ti nasao a ramit. Nakitaripnong pay idi ni Ms. Rhoda Galvan, Regional Corn Program Coordinator ken ni Mr. Oscar Tobia, Provincial Corn Coordinator iti Ilocos Sur iti nasao a panagtitipon.
Iti agdama, awan pay ti nakaagaw iti korona ti Barangay Turod Patac a kas Top Producing Barangay iti Hybrid iti Munisipalidad. Pammaneknek dagiti rinangkonna a pammadayaw itoy a pagsiglatan:
2014 SIGLAT AWARDS
Best in Agricultural Productivity
2013 SIGLAT AWARDS
Best in Agricultural Productivity
2012 SIGLAT AWARDS
Best in Agricultural Productivity
2011 SIGLAT AWARDS
Best in Agricultural Productivity . # (Web In-Action)
No comments:
Post a Comment