Cabugao, Ilocos Sur – Segun ken ni Mrs. Norma S. Bertumen, Market Supervisor nga adda regular a koordinasionda iti Department of Trade and Industry (DTI)-Vigan City iti pakaseknan ti presio ken pagkiluan iti Tiendaan.
Naipasdek ti masasao a: “Timbangan ng Bayan” iti dua a disso, iti kanatengan ken kakarnean/kaikanan tapno adda dumagasan dagiti aggatgatang ngem agpatingga laeng iti 15 Kilograms dagitoy a pagkiluan a libre.
Malaksid iti pannakamonitor ti presio, pagkiluan, pasilidades ti tiendaan ket maipampamaysa iti pannakamantener ti kinadalus iti uneg ken aglikmut ti tiendaan, pannakabantay ti trapiko ken pagplastaran dagiti lugan ken motorsiklo ken regular a kaadda dagiti Public Safety Officer iti uneg ti Tiendaan.
Nupay kasta, agtultuloy ti umay makitienda uray pay kadagiti agindeg iti kabangibang nga ili nangruna kadagiti Holiday Season kas iti umadanin a selebrasion ti Semana Santa.
Iti pannakiuman ti Web In-Action kadagiti Marketgoers a nangpadasen a nagpakilo iti Timbangan ng Bayan Weighing Scale ket kaaduanna nga apagisu ti kilo dagiti nagatangda ket no agkurang man ti gramo ket nadaras iti panagkinnaawatan dagiti aggatang ken aglako.
Dagitoy nga agtultuloy a panagsayaat ti kasasaad ti Tiendaan ket gubuay iti nasamay a koordinasion nga ipatpatungpal ti Management Staff/Personnel ti NISTC Public Market.
Iti sabali a bangir, segun ken ni Market Supervisor Norma S. Bertumen, Market Supervisor agtultuloy ti pannakalinis a nasayaat ti las-ud ti Tiendaan (NISTC Public Market) maigapu iti masungad a Holiday. Innayonna a tumulongda a mangbunag/mangipakni kadagiti dadduma pay a wara nangruna kadagiti selopin (non-biodegradable materials) ket agtultuloy nga isayangkat dagiti Personnel ti NISTC Public Market.
Innayonna pay a maar-aramid iti pannaka- “Flushing” iti basar ken stalls iti paglakuan ti ikan ken karne kasta met a maigidgiddan ti inspeksion kadagiti ambulant vendors babaen iti panagpasiar ken panangpalagip ti Public Sanitary Inspector ti LGU-Cabugao kadagiti Food Handlers nga aglaklako iti ikub ti Tiendaan.
Malaksid iti uneg ti Tiendaan, agtultuloy met ti koordinasion ti Opisina ti MENRO-LGU Cabugao ken ni Mrs. Bertumen iti agtultuloy a pannakadalus ti agsumbangir ti Kalsada Nasional a batog ti Tiendaan agraman kadagiti drainages tapno agtultuloy a nasigo ti sanitasion ken nasalun-at nga aglawlaw ti NISTC Public Market a para met laeng iti sapasap. # (Web Situational Report)
No comments:
Post a Comment