Cabugao, Ilocos Sur – Naaramid ti maikapat a parang (Marso 28, 2015) ti “Laing ti Talugading, Show Me, What You’ve Got”, programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. a maysa kadagiti naisangayan nga aktibidad a mangkulminar iti panagpiesta ti ili (Ragsak Cabugao Festival 2015) inton Abril 21-25, 2015 ken mangtakuat/mangmuli kadagiti talento/kabaelan iti benneg dagiti umili iti Cabugao, Ilocos Sur tapno pakairanudan dagitoy.
Nairugi ti nadakamat a pakontes idi Marso 7, 2015 (rabii ti Sabado) idiay Auditorium ti Cabugao Central Park (CCP) ket maikapat a Sabado ti pakontes iti Marso 28, 2015 a no sadino a ditoy ket nagbuyaan ti adu nga umili gapu iti makaparay-aw/makaliwliwa nga impakita dagiti nagpartisipar iti dayta a sardam.
Kalpasan ti (Elimination) iti uppat a Sabado, maisagana dagiti Finalists para iti Grand Finals a naituding a maaramid inton Abril 22, 2015.
Napasamak ti “Laing ti Talugading” iti maikapat a Sabado ket binukel dagiti nagsasalip ken naggapuda iti nadumaduma a sektor ti kagimongan.
Nagpaay a Program Hosts da Ms. Odette Vallejo Somera ken ni Mr. Dharen Jake Repollo Garcia, agpada a mangisursuro ken buklen dagiti nagpaay a Hurado dagiti maresrespeto iti kabaelanda iti kastoy a tay-ak ti paglaingan nga idauluan ni Mr. Bruce Lee Paragas, resident judge.
Idauluan met ni Mayor Ediboy dagiti nangesponsor iti pasalip nga isuda Vice Mayor DJ Savellano; Municipal Engineer Crescencio Marcos C. Formoso; MSWD Officer Mrs. Lydia S. Gazmen; Budget Officer Miss Marietta S. Cruz ken dadduma pay a naayat a nakitinulong iti panagballigi ti pasalip. # (Web In-Action)
No comments:
Post a Comment